Emil Kurbedinov, Aluşta mustaqil musulman cemiyetiniñ sabıq reisi Lenur Halilovnıñ advokatı, Rusiye Federatsiyasınıñ Arhangelsk vilâyet mahkemesiniñ orta küz ayınıñ 14-nde çıqarğan qararına qarşı temyiz talabını berdi. Qararğa köre, Halilov cezahanege qaytarılmaq kerek. Şikâyet berilgeni aqqında Kurbedinov "Qırım birdemligi" cemaat birleşmesine bildirdi.
Avgust ayında Arhangelskniñ İsagor rayon mahkemesi Halilovnı 18 yıllıq apis cezasından azat etmege qarar alğan edi, çünki onıñ hastalığı RF ükümetiniñ cedveline kirsetilgen. Bu cedvelde ağır hastalıqlar qayd etile, olar olğan taqdirde mahküm azat etile bile. Halilovda bir qaç hastalıq qayd etildi.
Amma orta küz ayında, Halilov evge qaytqan soñ, RF Arhangelsk vilâyet mahkemesi prokurornıñ Halilovnı koloniyağa qaytarmaq muracaatını qanaatlendirdi.
Advokat Emil Kurbedinovnıñ fikrince, mahkeme qarar çıqarğanda imayeniñ itirazlarını köz ögüne almadı ve kerçekten olarnı körmedi. Advokatnıñ aytqanına köre, Lenur Halilov "mahkeme esnasında imaye ve iştirak aqqından" marum etildi.
Advokat, Arhangelsk vilâyet mahkemesiniñ qararını lâğu etmege, Rusiye prokurorınıñ mahkemede qabul etilgen temyiz arizasını qanaatlendirmemekni, RF İsakogorsk rayon mahkemesiniñ qararını deñiştirmemekni, em de imayecilerniñ Halilov faydasına olğan delillerini ögrenmekni rica etti.
Boş aynıñ 8-nde Halilovnıñ evine vatandaş urbasında dört adam keldi. Onıñ ömür arqadaşı Umida Hudoberdiyevanıñ aytqanına köre, quvetçiler bir de bir vesiqa qaldırmadı, mahkeme qararını ellerinde kösterdiler, Halilovğa "tanış olmağa" teklif ettiler. Qadın, aqayını ne yerge alıp ketkenlerini ve koloniyağa qadar ne yerde bulunacağını bilmey.
Lenur Halilov — Aluşta mustaqil musulman cemiyetiniñ sabıq yolbaşçısıdır.
2019 senesi ilk yaz ayınıñ 10-nda Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ sekiz kişi tutuldı: Ruslan Nagayev, Eldar Kantemirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye akimiyeti Nagayev ve Umerovnı Rusiyede terroristik tanılğan, amma bir çoq memlekette milliy qanunlar seviyesinde sıñırsız faaliyet köstergen "Hizb ut-Tahrir" islâm siyasiy firqasınen alâqaları bar dep qabaatladı.
2021 senesi arman ayınıñ 16-nda Cenübiy okrugınıñ arbiy mahkemesi "Aluştadaki Hizb ut-Tahrir gruppasınıñ" mabüsleri Ruslan Nagayev, Eldar Kantimirov, Ruslan Mesutov ve Lenur Halilovnıñ ükmüni çıqardı. Erkekler terror faaliyetinde qabaatlanıp, 13, 12 ve 18 yıl sert rejimli koloniyada qalmasına üküm etildi.