Qırım.Aqiqat cenkniñ kündelik ayatı aqqında tezkerelerni yayınlamağa devam ete. Bu sefer bizim qaramanımız Ukrayina Silâlı quvetleriniñ sıralarında olğan qırımtatardır. Şartlı ismi Han. O "hanmobil" ayday. Ateşke tutmalar vaqtında yuqlay ve bir kün tüfekni fotoapparatqa deñiştirmege ümüt ete (telükesizlik sebebinden qırımlınıñ adı ve soyadını muaaririyet yazmay - QA).
Nasıl Han oldım
Şartlı ismim Han. Böyle oldı. Bizim oğlanlarımız, olar da qırımtatarlardır, maña Dede lağabını qoydılar. Ne içün? Men çalım, torunlarım bar ve ilâhre. Mında tüşken soñ daa bir şeyler uydurmayıp, bunı şartlı isim kibi qullanırım dedim.
Er şey bir qarar edi, amma soñra qomşu vzvodda da Dede bar olğanı belli oldı. Ve arada-sırada bazı şeylerni "boza" edi: de wi-fi, de daa bir şey. Bundan ğayrı talimler vaqtında birisi "Dede" dep çağırsa, ekimiz de aylanıp baqa edik. Oğlanlardan birisi maña dey: Kel seniñ şartlı ismini deñiştireyik. Sen qırımlısıñ da, saña Han deyik, Qırım Hanı olacaqsıñ". Ne içün yoq? Böylece men Han oldım.
Oğlanlar eşitkpeninen hahıldap başladılar. "Ne külesiñiz, - deyim, - bunı men özüm uydırmadım".
Söz sırası, arabama "hanmobil" deyler.
Bütün batalyon bile ki, hanmobilde er şey bar: aştan suvğa qadar
Bu tarafqa ketmege azırlanğanımızda aşayt hızmetiniñ reberi dedi: "Oğlanlar, mına suv, mına konservalar, istegeniñizni alıñız, sizge kerek olur". Allahqa şükür, menim arabam bar, suv, aş, ötmek, yaqarlıq aldım.
Mında keldik. Aşamağa istegenler soraylar: "Han, hanmobilinde aşamağa bir şeyiñ barmı?". Men çıqarıp, bölüşem. Bütün batalyon bile ki, hanmobilde er şey bar: aştan suvğa qadar. Hannıñ bunen bağlı iç bir probleması yoq. Men yedeklerimini daima tolduram. Aşayt hızmetiniñ reberi bile ki: arabama bir şeyler alsam, onen bölüşem.
Söz sırası, mında tatlı şeyler çoq aşalmay. Konservalar, kolbaslar tez aşala. Bankalardaki raviolilerni ise begenmedik, tek aşamağa bir şey olmasa aşaymız.
Ukrayina Silâlı Quvetleriniñ arabası, nümüneviy resim
Olümniñ yanında
Biz ateşniñ eñ merkezinde edik. Adamlarnı ğayıp ete edik. Başta minatopuları, gradlar uçıp kele edi. Soñra bu baht olğanını añladıq. Ya belâ nasıl? Eki ava raketası uçıp keldi, eki obyektni urdı, adamlar öldi.
Cenkte olğan bir çoq adam dindar ola. Men günâhkâr olğanım kibi, günâhkâr qalırım.
Ölümniñ yanında olğanda ruhtan tüşe bilesiñ. Talimler vaqtında közüm ögünde uruşqa istegen adam şimdi öz kölgesinden qorqa. Digeri, ateş astından çıqqan soñ ağlap başladı, eki aftadır ağladı.
Mende böyle qorqu neçündir olmadı. Şimdi bunı maqtanmayıp aytam. Bunı yanımda olğanlar tasdıqlay bile.
USQ arbiyi, nümüneviy resim
Böyle bir vaqia olğan edi. Aynı odada bir dairede yuqlaymız: men, daa bir bala ve bölük komandan. Ateşke tutma başlandı. Men perdeni açam. Yaqınlarda bir mayin tüşti. Deyim: "İşte, yaqın yerde tüşti". O ande yuqlağan oğlan hurulday. Men külip başlayım. Bölük komandanı ise: "Han, yuqlamağa berseñiz". Daa çoq küldim.
Okop lotereyadır
Okop lotereyadır. Öyle uçıp kele bilir ki, sen anda qalırsıñ. Aynı zamanda ayatnı da qurtara bile.
Maña okop qzmağa qısmet daa olmadı. Bulunğanımız yerde bizge dediler: "Okop qazmaqnı tüşünmeñiz bile, çünki landşaftnıñ deñişmesi deral mında bir şey kelip tüşücegine sebep olur". Olar da pilotsız uçaqlarnı yibereler. O zaman qayda saqlanmaq? Qayda tapsañ, anda.
Askerniñ tüşü
Biz mında dört qırımtatarmız. Berabermiz, kimerde menim arabamda yuqlaymız. Biri nevbetçi kibi qala. Er birimiz tüfekni quçaqlap yuqlay. Bir şey olsa, zırhlı yelekni kiyesiñ, kaskanı taqasıñ ve çapasıñ.
Kimerde asla yuquna toymaysıñ. Cebede olsañ, asla yuqusızsıñ. Bugün uçıp keldi. Darbe küçlü edi, amma men uyanmadım.
Yuqlamağa yatqanda başım yastıqqa tiydi, yuqlayım. Em de pek huruldayım.
Tanklarğa qarşı granadaatqıçlar, qurşunatqıçlar ve patronlar, nümüneviy resim
Avtomat yerine fotoapparat
İsteseñ de, istemeseñ de, amma avtomat seniñ devamındır. Sen onı besleysiñ, temizleysiñ, çünki seniñ ve etrafındakilerniñ ayatı oña bağlı olğanını añlaysıñ.
Tınç vaqıt kelecegini ve avtomatnı qaldırmaq kerek olacaqını tasavur ete bilemmi? Ebet. Men barışıqsever adamım. Menim fotoapparatım bar. Avtomatnı fotoapparatqa deñiştiririm. Ve belki de toylarnı çıqaracam, ya da bir de bir mediada foto mühbir olurım.
Mında bir oğlan bar. Bugün dımlama pişirdik, o bunıñ fotosını çekti. O bundan zevq ala. Men ise, fotoapparat daima yanımda olğanına baqmadan, mında bir resim bile çekmedim
Belki bir şey deñişir ve men bir şey çekmege isterim. Amma şimdi men tek kir ve ağrı körem ve bunı çekmege istemeyim.
MALÜMAT: Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.