Rusiye tarafından mahküm etilgen vatandaş jurnalisti ve faal Osman Arifmetov, Rusiyeniñ Krasnoyarsk vilâyetindeki Minusinskiy apishanesinde 22 kilo azdı. Bunı "Qırım birdemligine" onıñ anası Emdiye bildirdi.
Şimdi qırımlı sert tutuv şaraitlerinde buluna ve oña telefondan laf etmek yasaq. Lâkin ne içün onı sert tutuv şaraitlerine yerleştirdiler — belli degil.
Qayd etilgenine köre, apishanede bütün mahkümlerge domuz etini bereler, qırımtatar diniy baqışları içün onı aşamay. Ğaliba, Arifmemetov yaramay aşağanı içün bayağı azdı.
"Pek şikâyet etmey, bir şey aytmay. Qısqadan aytsaq, bilgenimiz bu... Ne içün o, o qadar azğamı — añlamayım... Sırt ağrısı sebebinden terapevtke muracaat etti. Terapevt qabul etti, teşkerüv yaptı, sanki baqıp çıqtı — qan normal, amma sidik yaramay. Bu büyrek sebebinden olğanını ayttılar. Onıñ büyrekleri ile bağlı bir mesele bar eken. Bilmeyim, nasıl — bu şeylerni de aytmay", — dep ayttı onıñ anası.
Qadın, tibbiy bölükniñ yolbaşçısı Arifmemetovğa yalıñız eki ilâc — sırt ağrısı içün "Voltaren" ve siydik quvuğı infektsiyası içün yazılğan "Kanefron" — almağa izin bergenini bildirdi. Kerekli olğan diger ilâclar ekimlernen muzakere etilmeli.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.