İlk yaznıñ 19-na keçer gecesi Qırımda dronlarnıñ uçması, atış, Rusiye ava mudafaasınıñ işi ve patlavlar eşitildi. Qırımnıñ şimalinde Ermeni Bazarda ve Aqmescit rayonınıñ Sarabuz qasabasında onlarnen patlav sesi eşitildi, dep yaza Qırım telegram kanalları.
İlk yaznıñ 18-niñ aqşamından başlap Qırımnıñ ğarbındaki bir qaç qasabada dronlar uçqanı ve büyük kalibrli silâdan ateş açılğanı aqqında haber etildi. Böyleliknen, "Krımskiy vetr" telegram kanalı Nikolayevka, Bürlük, Uglovoye, Beregovoye, Keriç ve Qaçı şeerlerinde uçqan dronlar aqqında haber etti. Daa soñra bu kibi haberler Ermeni Bazar, Qurman rayonı ve Sarabuz rayonından keldi.
Gece saat 23:40-tan birge qadar Rusiye arbiy uçaq alanı yerleşken Sarabuz şeerinde 12 patlav oldı. Şimdilik bir de bir aqibetleri belli degil, "Krımskiy veter" bildirgen malümat ise qoşma tasdıqlanmaq kerek.
Gece saat birden başlap Ermeni Bazarda, şu cümleden "Qırım titanı" zavodı yanında patlavlar aqqında haberler peyda olmağa başladı. Atış ve patlavlar şeerde sabağa qadar eşitile edi. Muarririyet bu malümatnı teşkere.
Bundan ğayrı, İlk yaznıñ 18-nde saat 20:13-ten başlap 19-ı sabasına qadar Aqyarda dört kere ava telükesi ilân etildi. Şeerniñ Rusiye yolbaşçısı Mihail Razvojayev Aqyarnıñ Şimaliy tarafında urulıp tüşürilgen üç dron aqqında esabat berdi.
Rusiye Mudafaa nazirligi İlk yaznıñ 19-nda saba bildirgenine köre, Rusiye ava mudafaası RF-nıñ 11 regionı ve ilhaq etilgen Qırım ve Qara deñizde 133 dron urıp tüşürdi.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.