Oraqnıñ 3-ne keçer gecesi işğal etilgen ve Rusiye tarafından ilhaq etilgen Qırımğa uçucısız uçaqlar ücüm etti, bölgede ateş ve patlav sesleri eşitildi. Rusiye akimiyeti Aqyarda kene ava telükesini ilân etti. Bu aqta yerli gazetler de haber etti.
Aqyarnıñ Rusiye yolbaşçısı Mihail Razvojayev yerli vaqıtnen saat 3:16 şeerde ava telükesini ilân etti, bu vaziyet eki saattan ziyade devam etti. Aqyar akimiyeti ücüm tafsilâtları ve uçuşlar aqqında haber etmedi.
Aynı zamanda "Krımskiy veter" telegram-kanalı abunecilerine atış ve patlavlar aqqında haber etti. Aqyarda Fiolent burnu ve Qaçı uçaq alanı, Bağçasaray rayonında, Sarabuz qasabasında, Aqmescit rayonında, Novofedorovkadaki Saq uçaq alanı rayonında, Saq rayonında.
Telegram-kanalı yazğanına köre, patlavlardan soñ Eski Qırım şeerinde ve qomşu köylerde yarıq yoq oldı. Ğaliba, elektrik ast stantsiyasına darbe endirildi, dep haber ete "Krımskiy vetr".
Bundan ğayrı, uydu çekimleriniñ malümatına esaslanıp, o, gece ücümlerinden soñ bir sıra elektrik ast stansiyası zarar körgenini ve yanğanını bildirdi: Qarasuvbazarda, Qurmanda, Eski Qırımda, 2 Canköyde.
Bu malümatnıñ kerçekligini ve tolulığını Rusiye Federatsiyasınıñ Ukrayinağa keñ kölemnli basuvı şaraitlerinde tasdıqlamağa imkân yoq, amma muarririyet qayd etilgen haberlerniñ tasdıqlanmasını qıdırmağa devam ete.
İlk yazda Qırımdaki arbiy ve energetika obyektleri, Rusiye logistik yolları Ukrayina Silâlı quvetleriniñ eñ büyük ücümlerine oğray. Er kün yañı nişanlarğa darbeler aqqında haber etile, Qırımda yaqarlıq qıtlığı sebebinden adiy insanlarğa benzin satılmay, elektrik energiyası cedvelge köre berile, Keriç köpründe ise nevbetler bar. Bala şifahane müessiseleri ve lagerleri sentâbr ayına qadar raatlanğanlarnı qabul etmey.
Ukrayina Mudafaa naziri Mıhaylo Fedorov darbelerniñ maqsadını añlattı – "Qırım dronlarnen izolâtsiya etile". Onıñ aytqanına köre, bu "rusiyeliler içün pek beklenilmegen aqibetlerge yol aça bile".
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.