Rusiye kontrolindeki Qırım Yuqarı mahkemesi Yalta sakinini "devlet hainligi" ile qabaatlap, 21 yılğa apiske aldı, dep bildire Qırımnıñ Rusiye prokuraturası.
Müessisede qayd etkenlerine köre, erkek 2022 senesi fevral ayında Ukrayina Silâlı quvetlerine qoşuldı, bu ise Rusiye FSB-si tarafından taqiqat içün sebep oldı.
"2022 senesi fevral ayında mahküm etilgen Ukrayina Silâlı quvetleriniñ ayrı mehanizatsiya brigadasına qoşuldı, mahsus oquvdan keçip, arbiy urba ve ateş silâsını aldı. Bu müddetten başlap o, Rusiye Federatsiyasınıñ Silâlı quvetlerine qarşı arbiy areketlerde iştirak ete", — denile beyanatta.
Mahküm etilgenniñ adı ve soyadı bildirilmey, onıñ açıq fikri aqqında da haber etilmey. Ukrayina Silâlı quvetleri bu haberni izaatlamadı.
Bundan evel haber etilgenine köre, Rusiye kontrolindeki Qırım Yuqarı mahkemesi Saq rayonınıñ 33 yaşındaki sakinini devlet hainligi ile qabaatlı tanıp, onı 12 yıl sert rejimli koloniyada qalmasına üküm etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.