Rusiye kontrolindeki Qırımdaki Dünya mahkemesi "malümat serbestlikni qullanuvda suistimal" içün mustaqil "Qırım" gazetiniñ tesisçisi Seyran İbragimovnı qabaatlı tanıp, oña 250 biñ ruble para cezasını berdi, dep haber ete "Tribunal. Krımskiy epizod" telegram kanalı.
Böyle bir qararnı mahkemeci Sergey Moskalenko çıqardı.
Daa evel Qırım mahkemesi muarririyetni Rusiye ordusınıñ itibardan tüşürüvi aqqında maddesine köre 300 biñ ruble miqdarında para cezasınen cezaladı. Bundan da ğayrı, neşirniñ baş muarriri Bekir Mamutqa qarşı "malümat serbestliginiñ suistimal etilmesi" ve itibardan tüşürilüvi aqqında protokollar tizildi.
"Qırım" gazeti qırımtatar tilinde 1989 senesi iyül ayından berli çıqa ve qırımtatarlar Qırımğa qaytqan soñ bu tilde çıqqan ilk neşirlerden biridir.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.