Soñki vaqıtları Rusiye akimiyetiniñ kontroli altında olğan Qırım kütleviy haber vastaları er kün Ukrayina silâlı quvetleriniñ ğayıpları sayısını arttırmağa başladı. Bu yılnıñ qış-baar aylarında olarnıñ esabatları künde tahminen biñ insan arasında deñişken olsa, şimdi bu raqam eki qat arttı.
Qırım Reintegratsiyası Assotsiatsiyasınıñ eksperti, uquq ilimleri doktorı Borıs Babinniñ fikrince, bu manipulâtsiya Rusiye arbiy teşviqatınıñ esas qısmı oldı.
"Rusiyelilerniñ arbiy teşviqatınıñ esas maqsadı istilâcı nezaretindeki ealige, şu cümleden işğal etilgen Qırımğa da tesir etmektir. Soñki yarım yıl devamında Rusiye ordusı keniş cebede ücüm areketlerini yapa, ve bu, öldürilgen ve ağır yaralanğanlarnıñ, şu cümleden qırımlılarnıñ tuvğanlarınıñ "şahsiy tecribesinde" körüngen kibi, Rusiye arbiy hızmetçileriniñ ğayıpları bayağı arttı. Aynı zamanda, bazı virtual "ğalebeler" ile propagandada bunı toqtatmaq mümkün degil, çünki zapt etilgen köyler olaraq ilân etilgen ayrı köylerni, kimerde üçünci kere bile, haritalarda kimse qıdırmaycaq", — dep bildirdi Babin.
Qırımtatar Milliy Meclisiniñ reisi Refat Çubarov, Rusiye Federatsiyasınıñ Ukrayinağa qarşı cenkinde Rusiye ordusınıñ erkânında Qırımnen bağlı biñge yaqın insan elâk oldı, dep bildirdi. Amma bu tek qayd etilgen adiseler, elâk olğan qırımlılarnıñ kerçek sayısı daa çoq.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.