Avropa ve Avrasiya boyunca Freedom House Amerika aq-uquq qoruyıdıj teşkilâtınıñ programmalar müdiri Mark Berendt Qırımda Azatlıq Radiosınıñ frilanserı (Qırım.Aqiqat leyhası) Vladislav Yesipenkonıñ tevqif etilmesine cevap berdi. Onıñ sözlerine köre, jurnalistniñ tutuluvı – işğal etilgen Qırımda çalışqan mustaqil jurnalistlerni qorqutmaq içün devam etken bir kampaniyanıñ daa bir nümünesidir.
«Faallerniñ ve jurnalistlerniñ siyasiy sebeplerden maqsatlı taqip etilüvi – yarımada içün adiy bir şeydir. Bunen beraberlikte, Qırım sakini Yesipenkonı mustaqil advokatlarnıñ yardımından red etmesi içün basqı yapılğanı aqqında malümat bar. Bu, onıñ ve yarımadanıñ diger sakinleriniñ kibi de adaletli mahme aqqı olmağının köstere», – dep bildirdi Mark Berendt.
Martnıñ 16-nda Rusiye FSBsiniñ cemaat alâqaları merkezi, martnıñ 10-nda Qırımda Vladislav Yesipenko «Ukraina mahsus hızmetleriniñ menfaatları içün» malümat toplağanı sebebinden tutuldı, dep bildirdi.
Your browser doesn’t support HTML5
«У нас есть алгоритм осуществления давления на Россию» – Кулеба о деле Есипенко
FSB bildirgenine köre, Yesipenko Qırımda yaşayış ve insanlar toplaşqan yerlerniñ foto ve videolarını çıqarğan edi. Mahkeme onı Qırımda apiske aldı.
Müessise, Yesipenkonıñ şaatlığına esaslana. O, «Ukraina Tış istihbarat hızmetiniñ 5-inci departamenti 8-inci yedeginiñ zabiti polkovnik Kravçuk V.A. emrinen Ukraina mahsus hızmetleriniñ menfaatları içün malümat topladı ve onıñ tevsiyesinen telükesizligini qorumaq içün maşinasında el yapılğan patlayıcı cihaznı saqladı», dep aytqan eken. Kreml kontrolindeki mahkeme Yesipenkonı mayısnıñ 11-ne qadar apiste qaldırdı.
Ukraina Tış istihbarat hızmeti, FSBniñ Vladislav Yesipenkonıñ Ukraina mahsus hızmetleri ile işbirligi aqqında malümatını Qırım.Aqiqatqa aytıp, «Rusiye mahsus hızmetleriniñ provokatsiyalarını izaatlamay», dep bildirdi.
«Qırım işğaliniñ yılı arfesinde bu propaganda aktsiyası – ealiniñ diqqatını yarımadanıñ iç problemlerinden uzaqlaştırmaq içün yahşı bir manaçıqtır», – dep qoştı Ukraina Tış istihbarat hızmetiniñ matbuat hızmeti.
Qırım Muhtar Cumhuriyetiniñ prokuraturası, Ukraina uquq qoruyıcıları Qırımda Vladislav Yesipenkonıñ tutuluvı ve apiske alınması sebebinden cinaiy tahqiqat başlattı, dep bildirdi.
Ukraina Tış işler nazirligi Qırımda tutulğan Vladislav Yesipenkonen mustaqil advokatnı körüştirmege talap ete.