Qırımdaki mahkeme «Çubarovnıñ davası» boyunca şaatlarnı sorğuğa çekmege devam ete

Rusiye kontrolindeki Qırım Yuqarı mahkemesi avgustnıñ 19-nda Qırımtatar Milliy Meclisiniñ reisi Refat Çubarovğa qarşı dava boyunca şaatlarnıñ sorğusına devam etecek.

Bu aqta tayin etilgen advokat Aleksandr Osokin Qırım.Aqiqatqa bildirdi. Başqa bir şey aytmadı.

Aqmescitte keçirilgen «Çubarovnıñ dava» mahkemesi aqqında yerli kütleviy haber vastaları da bildire. Akimiyetke qol tutqan «Krım 24» telekanalınıñ malümatına köre, «mahkeme yanındaki vaziyet yahşı» ve Rusiye uquq qoruyıcılarınıñ «kontroli altında buluna».

Advokat Nikolay Polozovnıñ bildirgenine köre, Qırımdaki mahkeme oña Refat Çubarovnı qorçalamağa izin bermegen soñ qabaatlav tarafınıñ eñ az 16 zarar körgen kişisini ve şaatını sorğuğa çekti.

Aqmescitte iyülniñ 23-nde mahkemede Qırımtatar Milliy Meclisiniñ reisi Refat Çubarovğa qarşı cinaiy dava temelden baqılıp başlandı. Mahkeme vekilleri diñleyicilerni oturışuvğa ve mahkeme binasına kirsetmedi, dep bildirdi «Qırım esnası» teşebbüsiniñ faalleri.

Advokat Nikolay Polozovnıñ Qırım.Aqiqatqa bildirgenine köre, oña bu davada Çubarovnı qorçalamağa izin bermediler, çünki «menfaat zıddiyeti bar». O, bu qararnı şikâyet etmege niyetlene. Aqmescitte mahkeme advokat Polozovnıñ şikâyetini endi red etken edi.

Bu sene mart ayınıñ soñunda Rusiye Tahqiqat komiteti Qırımtatar Milliy Meclisiniñ reisi Refat Çubarovnı ğıyabiy şekilde qabaatladı. Cinaiy davalar Rusiye Ceza kodeksiniñ 212 maddesiniñ 1-inci qısmı (qalabalıqlarnı teşkil etüv), 280.1 maddesiniñ 2-nci qısmı, 280.1 maddesiniñ 1-inci qısmına istinaden (Rusiye topraq bütünligini bozacaq faaliyetke açıq çağıruv) açıldı.