Kreml kontrolindeki Qırım Yuqarı mahkemesi Yalta sakini Elina Mamedovanıñ evinde tintüv keçirmege izin bergen mahkeme qararına qarşı bergen şikâyet arizasını red etti. Bu aqta Qırım.Aqiqat mühbiri haber ete.
Noyabrniñ 28-nde «VKontakte» içtimaiy ağında paylaşqan bir qaç yazı içün nefret ve duşmanlıq doğurğanında qabaatlanğan Elina Mamedovanıñ dairesinde tintüv keçirildi, tiş fırçısı alındı.
Bu sene iyünniñ 13-nde Rusiye FSBsi hadimleri Elina Mamedovanı Autka (Çehovo, Yalta) köyündeki evini tintken soñ tuttılar. Rusiye Tahqiqat komitetinde olğan sorğudan soñ onı yiberdiler.
Mamedovağa qarşı Rusiye Ceza kodeksiniñ 282-nci maddesiniñ 1-inci qısmı boyunca «VKontakte» içtimaiy ağında 2014 ve 2015 seneleri paylaşqanları içün cinaiy iş açıldı.
Noyabrniñ 15-nde Rusiye Devlet dumasınıñ deputatları paylaşuv içün cinaiy mesüliyetni lâğu etecek qanun leyhasını birinci oquvda qabul etti. Bu sene iyünniñ 7-nde olğan canlı yayında Rusiye prezidenti Vladimir Putin bunıñ kibi areketler içün cezalar «marazm ve absurd» olmamalı, dedi.