Kreml kontrolindeki Aqmescitniñ Kiyev rayon mahkemesi «Hizb ut-Tahrir davasınıñ» eki mabüsi Arsen Abhairov ve Eskender Abdulganiyevniñ sıñırlav müddetini uzattı. Qırım.Aqiqat mühbiriniñ bildirgenine köre, qırımtatarlar 2019 senesi sentâbrniñ 13-ne qadar Aqmescit SİZOsında qalacaq.
Advokatlar Lilâ Gemeci ve Edem Semedlâyev mahkemeden müvekkillerini ev apsine yibermesini rica ettiler, amma mahkeme muracaatlarını qanaatlendirmedi.
Eskender Abdulganiev mahkemede, Aqmescit, 2019 senesi iyülniñ 9-ı
Advokat Semedlâyev olıp keçken oturışuvnı izaatlap, müvekkili Arsen Abhairov mahkemege apiske alınğanından berli bir de bir tahqiqat tedbiri keçirilmedi, dep bildirgenini ayttı.
Daa evel Rusiye kontrolindeki Aqmescitniñ Kiyev rayon mahkemesiniñ qadısı Denis Didenko iyülniñ 9-nda «Hizb ut-Tahrir davasınıñ» (Qurman gruppası) mabüsi Rustem Emirüseinovnıñ apis müddetini 2019 senesi sentâbrniñ 13-ne qadar uzattı.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emirüseinov alındı. Fevralniñ 15-nde Kreml kontrolindeki Kiyey rayon mahkemesi olarnı tevqif etti.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.