Rusiye kontrolindeki Qırım Yuqarı mahkemesi faal, Aqmescitteki ekinci «Hizb ut-Tahrir davasınıñ» mabüsi Eskender Suleymanovnıñ nezaret altında qaluv müddetini uzattı.
«Qırım birdemligi» cemaat birleşmesi bildirgenine köre, qadı Aleksey Kozırev apiste tutuv müddetini dekabrniñ 10-na qadar uzatmağa qarar aldı.
«Tahqiqatçı copy & paste yolunen azırlanğan muracaatını bildirdi. Onı qanaatlendirdiler. Men mahkemede aynı muracaatlar qullanıla ve bugünde-bugün olarnıñ bir küçü yoq, dedim, çünki tahqiqat bitmek üzre. Dava malümatları ögrenile – Eskender tahqiqattan saqlanmağa tırışmadı. Tahqiqat dellilerinden biri bu ola. Bir de bir delilni de yoq etip olamay, çünki bütün deliller FSBde buluna ve dava malümatlarına ilâve etildi. Mahkeme sıñırlav tedbirini dekabrniñ 10-na qadar uzatmağa qarar aldı», – dep izaatları oturışuv neticelerini Rustem Kâmilev.
Onıñ bildirgenine köre, Suleymanov aşqazan ağrıları aqqında ayta.
«Bu 2013 senesi başlağan ülser hastalığınen bağlı. Müvekkilimniñ diagnozını tasdıqlağan tibbiy vesiqaları bar, amma SİZO olarnıñ Ukraina örnekli olğanını ve bir şey ifade etmegenini aytıp, olarnı körmemezlikke ura. Onı tibbiy tedqiqlerge çıqarmağa rica etken edi, amma bu ricalarına da qulaq asılmay. Suleymanovnıñ tiş problemleri de bar – protezleri sındı ve olarnı deñiştirmek kerek, amma kene de ricaları körmemezlikke urula», – dep qoşqan Kâmilev.
İmayeci advokat muracaatlarını berdi ve resmiy cevap bekley.
Your browser doesn’t support HTML5
«Kimse qalmadı, er kesni alğanlar». Apiske alınğan qırımlılarnıñ anası ikâye ete (video)
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 faal Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Edem Yayaçikov – ğayıp oldı, onıñ bulunğan yeri martnıñ 27-nden berli belli degil. Soñra daa bir şübheli Raim Ayvazov tutuldı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.