İklim deñişmeleri üzre Ükümetlerara mütehassıslar gruppasınıñ azası Svetlana Krakovskaya, Qırımda çoq miqdarda yağanaqlarnen yaramay ava global iklim deñişmeleri ile bağlı ve kelecekte ep ilerilecek, dep bildirdi.
Bunı o avgustnıñ 11-nde Qırım.Aqiqat Radiosınıñ yaynında bildirdi.
Onıñ sözlerine köre, Qırımda ava deñişmeleri – qurğaqlıq ve tufanlar – yıl yıldan devam etecek ve sıq-sıq olğan adiselerge çevirilecek.
«Global iklim deñişmesiniñ regional körünmesi avanıñ kettikçe orta qararlardan uzaqlaşmağa başlağanı ile özüni köstere. Buña köre, kerçekten de, bir yıl devamında em qurğaqlıq ola bile, em de tufanlar. Şunıñ içün yazıq ki, global isinme seviyesiniñ artması ile böyle adiselerniñ olma ihtimalı ep artacaq», – dedi o.
Qırımnıñ Rusiye Fevqulâde vaziyetler nazirliginiñ idaresi 2021 senesi iyünniñ 16-ndan 18-ne qadar küçlü yağanaqlar sebebinden Yaltada ve şarqiy Qırımda 426 azbarnı, 356 evni, 18 içtimaiy ceetten müim obyektni suv bastı, dep bildirgen edi. Umumen suv basqan yerlerden 1783 kişi tahliye etildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.