Rusiye kontrolindeki İslâm Terek rayon mahkemesi Noman Çelebicihan batalyonında iştirak etkeninde qabaatlanğan Mecit Ablâmitovnıñ davası boyunca beş şaatnı sorğuğa çekti. Olardan biri daa evel batalyonda iştirak etkeninde qabaatlanğan Aydın Mamutov bildirdi ki, şaatnıñ sorğu protokolında qayd etilgen malümatnı bermedi. Bu aqta advokat Ayder Azamatov Qırım.Aqiqat mühbirine bildirdi.
«Şaat (Mamutov – QA) bildirdi ki, cenk uruşlarında olğan kontuziyası bar. Şaatlıq seslendirilgende şaat onı sorğuğa çekken FSB hadimleri sorğu protokolını oqumağa bermeyip, tek şaatlıq vesiqasını imzalamağa berdi», – dep bildirdi Mecit Ablâmitovnıñ imayecisi.
Şaat Seytibram Zeytullayev Ablâmitovnı tek bir kere kördi, dep ayttı.
«Şaat Zeytullayevniñ sorğu vaqtında bildirgenine köre, o, Mecit Ablâmitovnı bir kere kördi ve o cenk talimlerinde iştirak etmedi. Şaat, Mecit Ablâmitov «Asker» teşkilâtınıñ erkânında edi, olarğa şeadetname berilgen edi ve olar sıñır hızmetine yardım etken edi, dep ayttı. Aytmaq kerek ki, «Asker» cemaat teşkilâtı 2016 senesinden berli resmiy şekilde qayd etilgen teşkilât ola», – dep qoştı advokat Azamatov.
Avgustnıñ 19-nda Rusiye FSBsi «ukrain milliy batalyonında» iştirak etkeninden şübheli sayılğan Qırımnıñ İslâm Terek rayonınıñ sakinini tuttı, dep bildirdi. İslâm Terek rayonınıñ sakinine qarşı cinaiy dava açıldı. Al-azırda şübheli tutuldı. FSB, qırımlı 2016 senesi esas Ukrainağa ketip, «Lenur İslâmov qurğan N.Çelebicihan batalyonına» kirdi, dep bildire.
Qırım Muhtar Cumhuriyetiniñ prokuraturası «Noman Çelebicihan göñülli qırımtatar batalyonında» iştirak etkeni içün Ukraina vatandaşınıñ qanunsız tutuluvı ve evinde tintüv keçirilüvi boyunca cinaiy tahqiqat başlattı.
Daa evel Qırımda qurucısı Lenur İslâmov olğan «Noman Çelebicihan göñülli batalyonınıñ» azaları olaraq tanılıp qabaatlanğan üç qırımtatarına qarşı qabaatlayıcı qarar çıqarılğan edi. Bu birleşmeniñ azaları olğanınen bağlı şübheler ile qırımlılarğa qarşı eki ğıyabiy qarar da çıqarıldı.
Your browser doesn’t support HTML5
Tintüv, apis, SİZO: Mecit Ablâmitovnıñ ikâyesi (video)
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete.
Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.
«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.