İşğal etilgen Qırımda 2024 senesiniñ başından 92 insan siyasiy sebeplerden apiske alındı, 46-sı qırımtatardır. Bu aqta Qırımtatar resurs merkeziniñ idare yolbaşçısı Eskender Bariyev "Qırımda insan aqlarınıñ bozuluvı taliliniñ 2024 senesiniñ birinci yarısında" taqdim merasimi vaqtında bildirdi, dep haber ete Ukrinform.
"Qırımda 2024 senesiniñ birinci yarısında apiske alınğanlarnıñ sayısı 92 oldı, olardan 46 tamır qırımtatar halqınıñ vekillerine qarşı", — dep qayd etti o.
Bariyevniñ aytqanına köre, 2024 senesiniñ birinci yarısında aq qorçalayıcılar 51 tintüv, 71 yaqalanuv ve 63 sorğu, sorav ve subet qayd etti. Em de 23 kere beden ve ruhiy sağlıqnıñ yüksek seviyesine irişüv aqqınıñ bozuluvı aqqında belli.
QMC idare yolbaşçısı qayd etti ki, bu raqamlar daa çoq ola bile, çünki tutulğanlarnıñ episi uquq qoruyıcılarğa muracaat etmey ve Rusiye quvet strukturalarınıñ basqısı altında bu kibi adiselerni sessiz qaldıralar.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Hususan, Rusiye tarafdarı olğan qırımlı bloger Aleksandr Talipov öz telegram kanalında Ukrayinağa qol tutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar tutula ve Rusiye ordusınıñ "areketini yaramaylaştırğanı" içün memuriy ve cinaiy mesüliyetke çekile.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.