Qırımnıñ bir sıra şeerinde cemaat naqliyatındaki yol fiyatı masraflarğa uymay ve arttırılmalı, dep bildirdi Devlet fiyat komitetiniñ vekilleri Rusiye kontrolindeki «Qırımnıñ cemaat palatası ile keçirgen» toplaşuvında.
Qırımnıñ Rusiye ükümetiniñ saytında haber etilgenine köre, talil neticesinde Keriç, Aluşta, Aqmescit, Canköy, Kefe, Yalta ve Kezlevde 17 ruble, Saq, Sudaq ve Bağçasarayda 15 ruble olaraq fiyat belgilendi.
Al-azırda Aqmescitte avtobusta yol fiyatı 13 ruble ola. Yaltada – marşrut taksilerinde 13 ruble ve trolleybuslarda 14 ruble. Keriçte marşrut taksilerinde 13 ruble, avtobus ve tramvayda – 15 ruble.
Devlet fiyat komiteti bildirgenine köre, «Qırım cemaat palatasınıñ» azaları «taşıyıcılar şartlarğa uyıp, şeer ve şeer civarı avtobuslarınıñ areketi cedveline riayet etse, fiyat arttırıluvına qoltuttı».
Qırımnıñ bir sıra şeerinde cemaat naqliyatındaki yol fiyatı 2019 senesi yanvarniñ 1-nde arttırılğan edi.
2018 senesiniñ soñunda Rusiye kontrolindeki Qırım parlamentiniñ deputatları şeer ve şeer civarındaki naqliyatqa biletsiz minüv içün para cezasını beş qat arttırdı.
Qırımda 2019 senesi yanvar ayında azıq malları 1,4%-ğa paalılaştı, azıq olmağan mallar ise 0,3%-ğa, paralı hızmetlerniñ fiyatları 1,3%-ğa arttı. Krımstat malümatına köre, eñ çoq sebze, qartop, çay, qave, kakao, tatlı, un paalılaştı.