Yağğan qarğa baqmadan, Aqmescit suv anbarı tolmay, dep bildirdi Qırımnıñ Rusiye yolbaşçısı Sergey Aksenov fevralniñ 15-nde suv teminlevi meseleleri operativ ştabınıñ toplaşuvında.
«Qar yağdı, qar çoq oldı. Dağlarda da qar yağdı, bayağı çoq oldı. Vaziyetni tüzetmek içün bu qadar qar yeter, dep ümüt etemiz. Eñ azından Qırımnıñ cenübiy yalısında yeter, Aqmescitte – baqarmız. Ayan suv anbarı ilâve suv ala, Aqmescit suv anbarı şimdilik, ne yazıq ki, künde yediden on biñge qadar», – dedi o.
Qırımnıñ Rusiye Nazirler şurasınıñ reisi Yuriy Gotsanükniñ malümatına köre, keçken raatlıq künleri yarımadada 2-den 25 mm qadar yağanaq yağdı, eñ çoq – dağ, dağ aldı ve Qırımnıñ şimaliy-ğarbiy qısmında.
Aqmescitte fevralniñ 12-13-nde aylıq normanıñ üçte ekisi yağdı, cemaat naqliyatınıñ işi zorlaştı.
Qırım.Aqiqat bildirgenine köre, Qırımda qar Aqmescit rayonınıñ Anğara (Perevalnoye) köyü yanındaki Qızı Qoba parkındaki Su-Uçhan şelâlesini yerastı suvlarınen toldurdı.
Fevqulâde vaziyetler nazirligi, ava arareti iklim normasından 7-8° az olacaq furtuna havfı fevralniñ 18-ne qadar devam etecek, dep hatırlattı.
Qışta güzel olğan yerler: qarnen örtülgen Qırımnıñ parlaq fotoresimleri (fotosüret)
Yerli Gidromenttsentrniñ yanvar monitoringi malümatına köre, Qırımnıñ suv anbarlarında fevralniñ başında 36.052 mln metr kub suv bar. Bu bir ay evelsi olğanından 4.744 mln metr kub çoq ve bıltırğa baqqanda 48.875 mln metr kub azdır. Rusiye kontrolindeki Qırım Fevqulâde vaziyetler nazirliginiñ malümatına köre, fevralniñ 1-nde yarımadanıñ daa üç suv anbarı «ölü seviyege» yaqınlaşqan edi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.