İşğal etilgen Qırımda Rusiye Yuqarı mahkemesi Yalta sakinini "casuslıqta" qabaatlı tanıdı. Bu aqta mahkemeniñ resmiy Telegram kanalında haber etile.
Qayd etilgenine köre, Yalta sakini (1993 senesi doğma) devlet hainliginde qabaatlı tanıldı (Rusiye Federatsiyasınıñ Ceza kodeksiniñ 275 maddesi). Qırımnıñ rus prokuraturasınıñ malümatına köre, erkek 2023 senesiniñ ortasında Ukraнina Mudafaa nazirliginiñ temsilcisi ile bağ qurıp, Rusiyege qarşı faaliyetke yardım etmege azır olğanını bildirgen.
"2023 senesi boş ayda o, Aqyarda silâ ve arbiy tehnikanıñ yerleştirilüvi aqqında malümat toplap, bermek kerek edi. Genç adam video çıqarıp, arbiy gemilerniñ yerleştirilüviñ taslaqlarını yapıp, malümatnı çetel devletiniñ temsilcisine yolladı", — dep bildirdi prokuratura.
Mahkeme onı qabaatlı tanıp, sert rejimli tüzetüv koloniyasında 18 yılğa azatlıqtan marum etti. Mahkemelengen şahısqa 1 yıl 10 ayğa azatlıqtan marum etüv şeklinde qoşma ceza tayin etildi.
Cinaiy davanıñ baqılması qapalı mahkeme oturışuvında keçti, çünki dava malümatlarında devlet sırı olğan malümat bar edi.