Aqmescitte «Veciye Kaşka davasınıñ» mahkeme oturışuvı martnıñ 26-na avuştırıldı. Davanıñ eki mabüsi Asan Çapuh ve Ruslan Trubaç yoq ediler. «Qırım birdemligi» birleşmesiniñ bildirgenine köre, olar hastahanede bulunalar.
«Asan Çapuh tünevin hastahanege yattı, çünki bir sıra hastalığı bar ve teşkerüvden keçmesi kerek», – dep ayttı Çapuhnıñ advokatı Ayder Azamatov.
Advokat İslâm Velilâyevniñ aytqanına köre, onıñ müvekkili Ruslan Trubaç da aftanıñ başından berli Kefe hastahanesinde buluna.
Aqmescitniñ Kiyev rayon mahkemesi «Veciye Kaşka davası» mabüsleriniñ tevqifini mayısnıñ 7-ne qadar uzatqan edi.
2017 senesi noyabrniñ 23-nde Aqmescitte Rusiye uquq qoruyıcıları Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşı Yusuf Aytandan para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.
Yanvarniñ 27-nde Kreml kontrolindeki Aqmescitniñ Kiyev rayon mahkemesi «Veciye Kaşka davasınıñ» mabüsleri Bekir Degermenci, Kazim Ametov ve Ruslan Trubaçnıñ sıñırlav tedbirini deñiştirip, olarnı ev apsine aldı.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.