Qırımda ve Aqyarda «mayın qoyulğanı» aqqında haber etilgen soñ insanlar tahliye etildi, dep bildirdi Rusiye kütleviy haber vastaları.
«RİA Krım» malümatına köre, Rusiye uquq qoruyıcıları «Qırım paytahtında «mayın qoyulğanına» dair haber kelgen soñ mecburiy tibbiy sigorta territorial fondu binasını teşkere».
Müessise hadimleri tahliye etildi.
Aynı vaqıtta Aqyarda bir qaç obyekt, şu cümleden mektep ve hastahanelerde «mayın qoyulğanı» teşkerile, dep yaza «Vesti Krım».
Aqyardaki №1 A.S.Puşkin gimnaziyası ve №8 Gimnaziya poçtasına «mayın qoyulğanı» aqqında haber keldi. Eki oquv yurtundan 1200-den ziyade bala tahliye etildi.
Aqmescit mekteplerinde «mayın qoyulğanı» aqqında haber kelgenini inkâr eteler.
Rusiye uquq qoruyıcıları Qırım ve Aqyarnıñ «mayın qoyulğan» müessiselerinde telükeli bir şey tapmadı. Qırım ve Aqyardaki Rusiye Fevqulâde vaziyetler nazirligi idaresiniñ bunıñnen bağlı resmiy malümatı olmadı.
Çarşenbe künü, yanvarniñ 30-nda, qomşu Rusiyeniñ bir qaç şeerinde anda olması mümkün patlavlar aqqında haber etilgen soñ mektep ve diger binalar tahliye etildi.
Bu ve keçken afta onlarnen mektep, bala bağçaları, hastahane, meskün ev, memuriyet ve alış-veriş merkezlerine patlayıcı maddeler qoyulğanı aqqında haber kelgen edi.
2017 senesiniñ soñunda Rusiyede mayın qoyulğanına dair bir sıra haber kelgen edi. Bir qaç ay içinde eki milliondan ziyade kişi tahliye etildi.