Rusiye tarafından işğal etilgen Qırımda uquq qoruyıcılar Rusiye devlet obyektleriniñ yaqılması ile bağlı 17 cinaiy davanıñ açılğanını tasdıqladı, dep bildire Avtozak LIVE uquq qoruyıcı leyhası.
İşğal etilgen Qırımda ve qomşu Rusiyede Rusiye ordusınıñ Ukrayinağa büyük istilâsı başlağanından berli uquq qoruyıcılar 547 insannı saydı, olar arbiy komissarlıqlar, memuriy binalar ve demiryol naqliyat obyektlerini yaqqanları ya da yaqmağa tırışqanları aqqında cinaiy davalarnıñ iştirakçileri oldılar.
"İlhaq etilgen Qırımnı ayrıca qayd etmek kerek. Biz 17 insannı tasdıqladıq, lâkin kerçekte daa çoq. Qırımda quvetçiler Çeçenistandaki zenaatdaşlarından alğan tövbe videoları ile bağlı ameliyatqa baqmadan, Qırımdaki vaziyet qapalı qala, ve er bir adise haberlerde qayd etilmey. Em de quvetçiler işkence altında şaatlıqlarnı elde etip, davalarnı uyduralar", — dep qayd eteler uquq qoruyıcılar.
2024 senesi aprel ayında Rusiye İç işler nazirliginiñ yolbaşçısı Vladimir Kolokoltsev bildirdi ki, quvetçiler memuriy binalarnı, şu cümleden arbiy komissarlıqlarnı ve demiryol naqliyat obyektlerini ateşke berüvden şübeli sayılğan 438 insannıñ şahsiyetini belgilediler. Avtozak LIVE uquq qoruyıcıları qayd eteler ki, kerçekten bu davalarda eñ az 547 insan iştirak ete, leyhanıñ talilcileri 402 kişiniñ adlarını bildire bildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.