Bir kün içinde işğal etilgen Qırımda koronavirus tarqaluvı sebebinden kirsetilgen sıñırlav tedbirleri 424 kere bozuldı, dep bildire Rusiye kontrolindeki Qırım ükümetiniñ yolbaşçısı Yuriy Gotsanük.
«8673 obyekt teşkerildi, 424 bozuv qayd etildi. Bu künü 363 bozuv yoq etildi. Qırım Cumhuriyeti yolbaşçısınıñ buyruq bozuvları boyunca politsiya ve prokuratura memuriyetleriniñ yolbaşçılarınen tenbi subetleri keçirildi», – dep bildirdi o.
Your browser doesn’t support HTML5
Koronavirus: balanı stressten nasıl qorumalı? Dünya sağlıq teşkilâtınıñ tevsiyeleri (video)
Rusiye akimiyeti, Qırımdaki taşıyıcılar maska rejimini boza, dep bildire.
Qırımnıñ Rusiye yolbaşçısı Sergey Aksenovnıñ bildirgenine köre, martnıñ 29-ı sabasına qadar Qırımda yañı koronavirus hastaları qayd etilmedi. Qırımda koronavirus yuqunçı sebebinden 2620 insan tibbiy közetüv altında buluna, olardan 2548-i evde dinamik tibbiy közetüv altında qala.
Hatırlatamız, 2020 senesi martnıñ 28-ne qadar Qırım yarımadasında 20 koronavirus hastası qayd etildi: 15 – Qırımda ve 5 – Aqyarda.
Koronavirus yuqunçınıñ tarqaluvına yol bermemek içün işğal etilgen Qırım ve Aqyarda «yüksek seviyeli azırlıq» rejimi ilân etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.