Qırımda "Hizb ut-Tahrir davasınıñ ekinci Aqmescit gruppası" figurantı, Rusiye Federatsiyasında 17 yılğa azatlıqtan marum etilgen faal Raim Ayvazovnıñ babası Halil Ayvazov vefat etti. Bu aqta "Qırım birdemligi" haber ete.
"İşke ketti, anda yaramadı. Er şey birden oldı", — dep bildire faaller elâk olğan kişiniñ tuvğanlarınıñ aytqanlarını.
Qayd etilgenine köre, Raim Ayvazov babasınıñ ölümi aqqında daa bilmey. Erkekler soñki sefer 2021 senesi Rostov-na-Donu mahkemesinde körüşken ediler.
2019 senesi martnıñ 27-nde Qırımda FSB, Rusiye İçki işler nazirligi ve Rosgvardiya hadimleri qırımtatar faalleriniñ, şu cümleden "Qırım birdemligi" cemaat birleşmesiniñ vekilleriniñ evlerinde tintüvler keçirdi. Umumen 24 insan yaqalandı. 2019 senesi martnıñ 27 ve 28-nde Aqmescitniñ Rusiye rayon mahkemesi bütün yaqalanğanlarnı yaqaladı, olarnıñ arasında Raim Ayvazov da bar edi.
"Memorial" uqu qoruyıcı merkezi martnıñ 27-nde Qırımda tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.