Qırım Yuqarı Şurasınıñ rusiyeli prezidiumı, ukrain faali Volodımır Baluhnıñ ev tevqifini apis müddetine saymaq prokuratura apellâtsiyasını qabul etti. Mahkeme, Baluh SİZOda keçirgen künlerni bir yarım kün dep saymaqtan vazgeçti, dep bildire Qırım uquq qoruyıcı gruppası.
Uquq qoruyıcılar qayd etti ki, Rusiye prokuraturası Baluhnıñ apis müddetini başqadan saymağa muracaat etti, ve bunıñ içün cinaiy davanı yañı mahkeme azalarınen yañı apellâtsiya baqıluvına yollamağa rica etti.
“Mahkemeci Lübov Dâçenko, advokatlarnıñ aytqanına köre, Rusiye qanunlarına zıt kelgen ve iç beklenilmegen qararnı ilân etti. O faalciniñ vaziyetini qıyınlaştırmağa qarar aldı, demek ki, onıñ SİZOda keçirgen müddetini bir künni bir yarım kün saymaqtan vazğeçmek qarar berdi. Mahkemeci bir künni bir kün kibi saymağa qarar aldı, böylece, koloniyada bulunuv müddeti uzatıla. Bundan ğayrı, mahkemeci davanı , prokuror muracaat etkeni kibi apellâtsiyağa yollamazdan qarar berdi”, - denile beyanatta.
Qırım uquq qoruyıcı gruppası hatırlattı ki, Rusiye CK-niñ 72-nci maddesiniñ 3-ünci qısmına köre, adamnıñ SİZOda tutılması tevqif müddetine bir kün yerine bir yarım kun kibi sayıla.
“Volodımır Baluh mahkeme oturışında video vastası ile iştirak etti. Uquq qoruyıcılr aytqanına köre, sıfatı yorğun edi ve, elbette ki, mahkeme qararına açuvı çıqtı. Bu qararnıñ temeli, advokat mahkere qarını vesiqalarını alsa, belli olacaq”, - dedi uquq qoruyıcılar.
Qırım uquq qoruyıcı gruppasınıñ başı Olga Skrıpnik bu mahkeme qararını qanunsız saya.
Qırım.Aqiqat Volodımır Baluhnıñ advokatınıñ tefsirlerini almağa tırışa.
Your browser doesn’t support HTML5
Непокорный Балух (видео)
Kreml kontrolindeki Qırım Yuqarı mahkemesi ukrain faali Volodımır Baluhnıñ imayesine cezası müddetiniñ ğayrıdan baqıluv muracaatını red etti. Kreml nezaretindeki Qırım Yuqarı mahkemesi Volodımır Baluhnı 4 yıl ve 11 ay umumiy rejim koloniyasında qalmasına ve 10 biñ ruble (tahminen 4 biñ ğrıvnâ) para cezasını ödemesine üküm etti. Faal eki cinaiy iş boyunca tevqif etildi.
2018 senesi martnıñ 19-nda Volodımır Baluh açlıqqa başlağan edi. Bir aydan ziyade bir şey aşamağan Baluh Arhiyepiskop Klimentnidiñlep, kisel içmege, peksimet aşamağa razı olğan edi. Daa soñra mahküm etilgen ukrain faali açlıqnı vaqtınca toqtatmağa qarar aldı.
Advokatlarnıñ malümatına köre, 200 künden çoq açlıq tutqan Baluhnıñ ülser ve pankreatit şübesi peyda oldı.
FSB, Volodımır Baluhnı 2016 senesi dekabrniñ 8-nde tuttı. FSB hadimleri Volodımır Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi.
«Memorial» aq qorçalayıcı merkezi Volodımır Baluhnı siyasiy mabüs olaraq tanıdı. Aq qorçalayıcılarnıñ fikirince, faalni taqip etüv sebebi evinde tiklegen «Sema Yüzü Qaramanları soq., 18» levhası olğan.