Rusiye kontrolindeki Qırım Yuqarı mahkemesi Keriçniñ 22 yaşındaki sakinini "devlet hainligi"nde (Rusiye Ceza kodeksiniñ 275-inci maddesi) qabaatlap, 14 yıl koloniyada qalmasına üküm etti, dep bildire Qırımnıñ Rusiye tarafından teşkil etilgen prokuraturası.
Qayd etilgenine köre, genç adam 2024 senesi qara qış ayında Keriçte Rusiye Mudafaa nazirliginiñ bölükleri yerleşken yerler aqqında malümat toplap, olarnı Ukrayina Mudafaa nazirliginiñ SBU ve GUR-ına bergen.
"Mahsus arbiy operatsiyanıñ keçirilmesine qarşı olıp, para mukâfatını almaq istegen erkek, Keriç şeerinde bulunıp, Rusiye Federatsiyası Mudafaa nazirliginiñ bölükleri yerleşken yerler aqqında malümat topladı. Qabaatlanğan adam, ekran fotoresimlerini, olarnıñ yerleştirilgen tam coğrafik koordinatlarınen beraber, Ukrayina telükesizlik hızmeti ve Ukrayina Mudafaa nazirliginiñ Baş istihbarat idaresi qullanğan chatqa yolladı", — dep aytıla müessiseniñ haberinde.
Gençniñ adı ve soyadı aydınlatılmadı, onıñ bu üküm boyunca açıq izaatları da yoq. Rusiye quvetçileriniñ aytqanlarını şimdilik teşkermek imkânsız.
"KrımSOS" aq qoruyıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etilgen edi. Cinaiy davalar içün sebepler olaraq Rusiye Federatsiyasında yasaq etilgen teşkilâtlarnen alâqalar, devlet hainligi, casuslıq, açıq beyanatlar, diverssiya teşkil etüv ya da zorbalıqqa çağıruvlar şeklinde qabaatlavlar qullanıldı.