Rusiye quvetçileri 19 yaşındaki Aqmescit sakinini Qırımda Rusiye İç işler nazirliginiñ yüksek vazifeli hadimine sanki ücüm azırlağanı içün yaqaladı, dep bildire Rusiye kütleviy haber vastaları.
Rusiye quvetçileriniñ bildirgenine köre, genç adam Rusiye ofitseriniñ evi ögünde bir daire kiralağan, video nezaretini teşkil etken, saqlanğan yerden patlayıcı aletlerniñ parçalarını alğan, bombanı toplağan ve Rusiye İç işler nazirliginiñ hadiminiñ şahsiy maşnasına yerleştirmekni planlaştırğan. Cenk şaraitlerinde Rusiye quvetçileriniñ aytqanlarını teşkermek qıyın.
Daa soñra Rusiye FSB-sı Rusiye kütleviy haber vastaları vastasınen, yaqalanğan gençniñ, FSB onı bu sene ilk yaz ayında celp etkenini aytıp, Rusiye FSB-sınıñ versiyasını tekrarlağanını köstergen video yayınladı. Bu ifadelerni mabüs basqı altında bere bile edi. Gençniñ adı ve soyadı aydınlatılmay, onıñ imayesiniñ açıq mevamı da yoq. Mahkemede qabaatı isbatlansa, oña ömürlik apis cezası berile bile.
"KrımSOS" aq qoruyıcı teşkilâtınıñ malümatına köre, 2024 senesi eñ azından 56 qırımlı Rusiye akimiyeti tarafından taqip etilgen edi. Cinaiy davalar içün sebepler olaraq Rusiye Federatsiyasında yasaq etilgen teşkilâtlarnen alâqalar, devlet hainligi, casuslıq, açıq beyanatlar, diversiya teşkil etüv ya da zorbalıqqa çağıruvlar şeklinde qabaatlavlar qullanıldı.