Qırımda Rusiye akimiyeti tarafından devlet hainligi (RF Ceza kodeksiniñ 275-inci maddesi) ve çetel devleti ile işbirligi (RF Ceza kodeksiniñ 275.1 maddesi) maddeleri boyunca qabaatlavlar arttı. Bu aqta ZMINA insan aqları merkeziniñ idare yolbaşçısı Tatyana Peçonçik Halqara "Qırım platforması" Ekspert ağınıñ III Halqara forumı vaqtında ayttı, dep haber ete "Suspilne Qırım".
Onıñ aytqanına köre, ukrayin uquq qoruyıcıları şimdilik böyle sekiz davanı nezaret eteler. Pechonçik, bu madde boyunca qabaatlavlarnıñ artması Rusiyeniñ Ukrayinağa istilâsı başlağanından soñ oldı, dep bildirdi. ZMINA insan aqları merkeziniñ idare yolbaşçısınıñ qayd etkenine köre, evelden Qırımda ananeviy siyasiy sebepli davalar, "Hizb ut-Tahrir" areketinde iştirak etüvde qabaatlav ve "İyegova Şaatları" davaları kibi diniy taqiplernen bağlı davalar edi.
"Şimdilik işğal etilgen Qırımda mahkeme nezareti devam ete. Ve o, bütün bu yıllar devamında devam etti. Tam bir istilâdan soñ ne deñişkenini köremiz. Birinciden, şimdi mahkemelerge irişim pek qıyınlaştı. Hususan, Qırımda sarı terror telükesi seviyesi ilân etildi. Bu demek ki, mahkemelerniñ çoqusında açıq mahkeme oturışuvları yasaq etile, şunıñ içün biz mahkeme esnaslarınıñ açıqlığı bozulğanını qayd ete bilemiz", — dedi Peçonçik.
Daa evel haber etilgeni kibi, Qırımtatar Resurs Merkezi Qırım ilhaqı vaqtında 331 siyasiy apis ve cinaiy davalar boyunca taqip adiselerini qayd etti, olardan 217-si - qırımtatar halqınıñ vekillerine qarşı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.