Qırımnıñ Aq Şeyh qasabasında Rusiye quvetçileri "İyegova şaatları" diniy teşkilâtınıñ 68 yaşında vekilini tuttı, dep haber ete RİA Novosti agentligi.
Qayd etilgenine köre, 2021 senesi sentâbr ayında qadın "İyegova şaatları" bölüginiñ faaliyetini teşkil etken.
"O, yasaqlanğan diniy teşkilâtnıñ ğayelerini teşviq etken ve ekstremist malümatnı ögrengenlerniñ toplaşuvlarını keçirgen edi", — dep aytıla haberde.
Söz Tamara Bratseva aqqında kete — evinde keçirilgen tintüvler aqqında evelden "İyegova şaatları" Avropa Assotsiatsiyası haber etken edi.
"İyegova şaatları" Avropa assotsiatsiyasınıñ malümatına köre, soñki 7 yıl içinde Qırımda 30 din adamı diniy sebeplerden taqip etildi.
"Krım SOS" uquq qoruyıcı teşkilâtınıñ talilcisi Yevğen Yaroşenko qayd ete ki, 2022 senesi dekabr ayına qadar Qırımda siyasiy sebepli cinaiy taqiplerniñ qurbanları arasında tahminen er sekizinci kişi "İyegova şaatları"dır, umumen - 19 kişi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.