Rusiyeniñ nezaretinde olğan Ermeni Bazar şeer mahkemesi qırımtatar haqlınıñ milliy lideri Mustafa Cemilevni ğıyaben apis cezasına mahküm etti. Bunı Qırım.Aqiqat mühbiri haber ete.
Böylece, Rusiye Ceza qanunnamesiniñ 222-nci maddesiniñ 1-inci qısmına binaen (silânı qanunsız alıp saqlav) mahkemeci Venera İsroilova Mustafa Cemilevni 1 yıl apis cezasına ve 15 biñ ruble para cezasına mahküm etti. Aynı zamanda, Cemilev mesüliyetke celp etilme müddetiniñ bitmesi sebebinden cezadan azat etildi.
Rusiye Ceza qanunnamesiniñ 224-ünci maddesine binaen (nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması) mahkeme 20 biñ ruble para cezasını tayin etti ve mesüliyetke celp etilme müddetiniñ bitmesi sebebinden cezadan azat etti. Rusiye Ceza qanunnamesiniñ 322-nci maddesiniñ 3-ünci qısmına binaen (Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv) Cemilev 2 yıl şartlı cezağa mahküm etildi ve "ğalebeniñ 70 yılı munasebeti ile" aministiyağa esaslanıp azat etildi.
Qırım.Aqiqat Mustafa Cemilev ve advokat Nikolay Polozovğa izaat almaq içün hitap ettiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Mustafa Cemilev
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.