Qırımdaki Rusiye mahkemesi tarafından "casuslıq" davası boyunca mahküm etilgen Yañı Kahovka jurnalisti Sergey Tsıgıpanı Rusiye pasportını almağa mecbur eteler. Bu aqta Ukrayina jurnalistleriniñ milliy birligi Tsıgıpanıñ qadını Olenağa atıf etip bildire.
"Jurnalist Serğiy Tsıgıpanı Rusiye pasportını almağa mecbur eteler!", — dep aytıla haberde.
Qayd etilgenine köre, jurnalist Rusiyeniñ Râzan vilâyetiniñ Skopin şeerindeki ceza izolâtorında tutula.
2023 senesi oktâbrniñ 6-nda haber etilgenine köre, Kreml kontrolindeki Qırım Yuqarı mahkemesi "casuslıq" davası boyunca Yañı Kahovka jurnalisti Serğiy Tsıgıpanı 13 yılğa azatlıqtan marum etti.
Serğiy Tsığıpa — jurnalist, faal ve Yañı Kahovkadan ATO veteranı. Rusiye istilâsı başlağanından berli o, göñülli faaliyetnen oğraşa, Ukrayinağa qoltutuv mitinglerinde iştirak ete ve cenüpte Rusiye areketleri aqqında haber ete edi.
O, keçken sene martnıñ 12-nden berli esirlikte buluna. Vatandaş serbestligi Merkeziniñ malümatına köre, 2022 senesi fevralniñ 24-nde o, "Yañı Kahovkanıñ informatsion öz-özüni mudafaası" leyhasını meydanğa ketirgen.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.