Qırımda keçken künü 10 yañı koronavirus hastası qayd etildi. 9-ı qırğınlıq ile küreş tedbirleri ve laborator skriningi neticesinde qayd etildi, 1-i hastanıñ tibbiy yardım içün muracaat etkende qayd etildi, dep haber etildi qırğınlıq ile küreş operativ ştabınıñ toplaşuvında.
Qırımnıñ Rusiye yolbaşçısı Sergey Aksenovnıñ qayd etkenine köre, Saq rayonı hasta sayısına köre lider ola.
Qırım ve Aqyardaki Rospotrebnadzor idaresiniñ yolbaşçısı Natalya Penkovskaya bildirgenine köre, Saq rayonındaki vaziyet zor qala ve «tam stabilleşüv olacağına oşamay». Onıñ malümatına köre, yañı hastalardan altısı Saq rayonında buluna, 4-ü daa evel qayd etilgen ocaqlarnen alâqası olmağan Saq hastahanesiniñ hadimi ola.
«Bu insanlarnıñ alâqada olğan insanları çoq. Hastalar liftçi, aşçı ve eki tibbiyet hadimi ola», – dep tarif etti Penkovskaya.
Yañı hastalar arasında – ekisi Yaltadan, Aqmescitte bir bala hastalandı ve observatsiyada bulunğan Sankt-Peterburg sakini.
Qırımnıñ Rusiye akimiyeti malümatına köre, bugünge qadar 324 yañı koronavirus hastası qayd etildi. 25-i çetelden keldi, 32-si Rusiyeden keldi. 130 kişi tüzeldi, 9 koronavirus hastası vefat etti. Aqyarda 148 yañı koronavirus hastası qayd etildi, eki kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.