İşğal etilgen Qırımnıñ Qarasuvbazar şeerinde yerli kommunal hızmetçisine siyasiy mana olğan şaqa içün on beş kün apis cezası berildi. Bu aqta Qırım.Aqiqatqa Qarasuvbazar cemaatçısı bildirdi, onıñ adını muarririyet telükesizlik sebeplerinden aytmay.
Onıñ malümatına köre, adise bu sene Oraqta kommunal hızmetçisi Qarasuvbazar merkeziy soqaqları boyunca sutunlarğa asılğan bayraqlarnı deñiştirgen vaqıtta yüz berdi.
"Kommunal hızmet hadimi direklerde bayraqlarnı deñiştirgende eski bayraqlarnı yerge atıp, yañılarını bayraçıqlarğa yerleştirgen. Bunı Rusiye tarafdarı olğan bir keçici kördi, o, üç renkli bayraqnıñ yerge atılğanına açuvlanıp, qıyamet qoparğan. Kommunalcı şaqa etip, akimiyet deñişkenini, Qırım Ukrayinağa qaytarılğanını, bayraqlar bu sebepten deñiştirilgenini ayttı. Qadın bu şaqanı añlamağan ve daa beter açuvlanğan ve polis çağırğan. Polis, kommunal hızmetiniñ yolbaşçıları kelgen ve bütün bular saçma olğanını añlap, vaziyetni tüzetmege tırışqanlar. Amma dava ep bir mahkemege yetken, ve şaqacı kommunalcı apiske alınğan", — dep ayttı cemaatçı.
İşğal etilgen Qırımda siyasiy fikir farqlı olğanlarğa qarşı basqı quvetleşe. Rusiye akimiyeti tarafından "çetel agenti" olaraq tanılğan Qırımdaki soñki mustaqil aq qoruyıcı areket "Qırım birdemligi" Oraqta siyasiy basqı sebebinden işini toqtatqanı aqqında bildirdi.