Rusiye tarafından ilhaq etilgen Qırımda Ukrayina mudafaa quvetleriniñ yerli energetik infrastrukturağa ücümleri neticesinde peyda olğan energetikada büyük problemler devam ete. Bir aftadan berli yarıq olmağan Qırım yarımadasınıñ şimaliy regionlarında vaziyet eñ kergin. Bu meselege yerli Rusiye akimiyetiniñ diqqatını celp etmege tırışqanlar quvetçiler tarafından taqip etile. Bu Krasnoperekopsk iş adamı Darya Barbanovanıñ başına keldi. Qırımlılarnıñ yarıq olmağanına şikâyetleri nasıl mahkeme davalarına çevirilgeni aqqında Qırım.Aqiqatnıñ materialında dep tarif etemiz.
Qırımnıñ elektrik teminlevi ile bağlı problemler İlk yaznıñ soñunda, Ukrayina Mudafaa quvetleri Qırımnı Rusiye logistikasından ayırmaq içün yapqan operasiyası çerçivesinde yerli energetik infrastrukturağa ücüm etip başlağanda başlandı. Neticede yarımadanıñ bütün regionları muntazam sürette yarıqsız qala. Eñ qıyın vaziyet Qırımnıñ şimalinde, anda bir aftadan berli elektrik yoq. İnsanlarnıñ öz problemlerine memurlarnıñ diqqatını celp etmek ıntıluvları akimiyet apparatınıñ faalleşmesine ketire.
"Bölgede vaziyetni kerginleştirüv aksiyası"
Ermeni Bazar ve Krasnoperekopsk ve Qırımnıñ şimalindeki diger regionlarnıñ sakinleri içtimaiy ağlarda ve, hususan, Qırımnıñ Rusiye yolbaşçısı Sergey Aksönovnıñ saifesinde yarıqsızlıqtan kütleviy şikâyetlerni bildireler.
Rusiye quvetçileriniñ qarşılığı sebebinden er kes oña irişip olamay.
Rusiye İç işler nazirliginiñ Qırım bölüginiñ Ekstremizm ile küreş merkeziniñ hadimleri Oraqta Krasnoperekopsknıñ 29 yaşındaki sakinine qarşı Rusiye Federatsiyasınıñ Memuriy cinayetler kodeksiniñ 20.2 maddesine istinaden (toplaşuv, miting, numayış, yürüş ya da piket teşkil etilmesi ya da keçirilmesini belgilengen tertibiniñ bozuluvı) memuriy protokol tizdiler.
Rusiye quvetçileri, Qırım
Quvetçilerniñ aytqanına köre, o, Oraqnıñ 7-nde Krasnoperekopsk sakinlerini "regiondaki içtimaiy-siyasiy vaziyetni kerginleştirmek ve akimiyet organlarına menfiy munasebetni şekillendirmek" maqsadınen şeerde "ruhsetsiz miting ve narazılıq aktiyalarını" keçirmege çağırğan.
Krasnoperekopsknıñ merkezi, arhiv fotoresimi
"Qadın, iş adamlarınıñ Qırım yolbaşçısına şeerdeki vaziyet aqqında video muracaatını yazmaq istegenlerini bilgenini añlattı. Kütleviy tedbirlerni yerli akimiyet organlarınen evelden añlaşmaq kerek olğanını bilmeyip, o, video çıqarıp, içtimaiy ağda yerleştirgen", — dep aytıla haberde.
Bu kerçekmi, tam olaraq belli degil, çünki bu aqta Qırımlı qadınnıñ açıq mevamı yoq.
Mahkeme on daqqa içinde
Qırım.Aqiqat, Krasnoperekopsk iş adamı Darya Barbanovağa qarşı memuriy protokol tizilgenini ögrendi. O, güzellik salonında çalışa.
Qırımlığa qarşı memuriy protokolnı Rusiye kontrolindeki Krasnoperekopsk şeer mahkemesi baqqan.
Oturış Oraqnıñ 8-nde olıp keçti, davanı mahkemeci Marina Matüşenko baqtı.
Mahkeme saytınıñ malümatına köre, mahkemeci davanıñ kerçekligini tek 10 daqqa içinde — 16:35-16:45 arasında — belgilegen
Memuriy işlerniñ bu qadar tez baqılması olarnı bütünley ve obyektiv şekilde talil etmege imkân bermey ve Qırımda bu sıq-sıq repressiv areketlernen bağlı, dep qayd eteler Ukrayin aq qorçalayıcıları.
Neticede Marina Matüşenko Darya Barbanovanı memuriy bozuvda qabaatlı tanıdı ve oña memuriy ceza berdi. Ne olğanını mahkemeniñ saytında aytmaylar.
"E" merkezinde, Qırımlı qadınğa 20 saat mecburiy cemaat işleri cezası belgilendi, dep bildireler.
Darya Barbanova mahkeme qararını açıq izaatlamadı. Qırım.Aqiqat onıñ mevamını aydınlatmağa azır .
"Armannıñ ortasından yengilce olurmı?"
Krasnoperekopsk ve Qırımnıñ şimalindeki diger regionlarda vaziyet kergin qala. Yerli sakinlerniñ aytqanına köre, olar bir aftadan berli yarıqsız yaşaylar. Çoqusı bu sebepten suvsuz qala.
"Bir afta devamında bir saatqa bile yarıq bermediler. İnsanlar aşayt mallarını atıp, işini ve alışqan yaşayışını ğayıp ete. Şeerlerde suv bile yoq. Şeerde de onı qısmen künde dört saatqa qadar söndüreler Bir qaç saat devamında yarıqnı açalar, dep aytalar. Bu kerçek degil! Elektrik energiyası bütünley kesildi", — dep aytıla Qırımnıñ şimaliy qısmından Qırım kütleviy haber vastaları tarqatqan anonim beyanatta.
Onıñ müellifleri, vaziyetnen bağlı muracaatlarnı Sergey Aksönovğa yazğanlarını iddia eteler. Bundan soñ müelliflernen yerli Rusiye memuriyetiniñ vekilleri bağlanıp, "Arnnıñ ortasına qadar er şey qolaylaşacaq", dep bildirdiler. Bundan ğayrı bir şey bildirilmedi.
Bu sebepten yerli sakinler özlerine sual bere: bu şaraitlerde nasıl yaşamaq mümkün?
Qızıl Haç teşkilâtınıñ Rusiye bölügi Qırım ve Aqyar içün "fevqulâde vaziyetlerge cevap berüv azırlığını quvetleştirmek içün qoşma para" yollağanını bildirdi.
Olar acele yardım içün gumanitar yardım yedeklerini teslim etkenlerini bildire: 800 aşayt taqımı, 700 gigiyena taqımı, 43 tonna içme suvu ve reabilitasiya tehnikası.