Rusiye quvetçileri işğal etilgen Qırımnıñ Aqmeçit qasabasınıñ sakinini Ukrayina Mudafaa nazirliginiñ Baş istihbarat idaresine RF ava mudafaasınıñ yerleşüvi aqqında malümat bergeninde şübheli sayıp yaqaladı. Bu aqta Rusiye kütleviy haber vastaları Rusiye FSB-sine atıf eterek bildire.
Rusiye mahsus hızmetiniñ versiyasına köre, qadın, WhatsApp vastasınen Mudafaa nazirliginiñ Bİİ temsilcisi ile bağlanıp, Qırımdaki Rusiye ava mudafaasınıñ obyektlerini videoğa çıqarğan ve elde etken malümatnı Ukrayin istihbaratına bergen.
FSB, bu malümat Ukrayina arbiyleri tarafından raketa-top darbeleri içün qullanıla bile, dep iddia ete. Qadınğa qarşı "devlet hainligi" maddesine istinaden cinaiy dava açıldı. Onı apiske aldılar.
Tutulğan kişiniñ adı ve soyadı bildirilmey. Cenk şaraitlerinde FSB iddialarınıñ doğrulığını teşkermek qıyın.
Ukrayina Mudafaa nazirligi vaziyetni izaatlamadı.