Rusiye kontrolindeki Qırım yolbaşçısı Sergey Aksenovnıñ aprelniñ 3-nde bildirgenine köre, eki yañı koronavirus hastası tasdıqlandı. Onıñ malümatına köre, hastalardan biri – qırımlı, Moskvadan keldi, ekincisi – soy-soplarına kelgen Moskva sakini. Böylece, Qırımda 18 koronavirus hastası qayd etildi, 16-sı ketirildi, eki kişi yerli, bir qorantadan ola.
«Alâqada olğan ve Qırımğa kelgen vatandaşlarnen bağlı profilaktika tedbirleri yapıla. Yaqından bağda olğanlar yuqunç bölüklerine alıp ketirildi. Uzaqtan bağda olğan ve kelgenler yaşağan yerlerinde tecrit etilip közetile. Bu vatandaşlarnıñ laborator tedqiqleri yapıla», – dep yazdı Aksenov Facebookta.
O, «er kesni özüni tecrit etmesine, mümkün olğanı qadar bağlarını kesmesine, acele bir şey olmasa, cemaat yerlerine barmamalarına çağırdı». Tükân, aphane ve yaşayış içün kerek olğan diger yerlerge barğanda, cemaat naqliyatında olğanda, eñ az eki metr mesafeni qorumağa çağırdı.
SEE ALSO: «Er kes evde qalsın»Rusiye kontrolindeki Qırım Sağlıq nazirliginiñ soñki malümatına köre, yarımadağa çetelden kelgen şahıslar arasında 3016 insan tibbiy közetüv altında buluna, olardan 2935-i evde dinamik közetüvde, 68 insan hastahanede ve 13 insan observatorlarğa tecrit etildi.
Aqyarda 5 kişi koronavirusqa oğradı.
Qırımda aprelniñ 3-nden 6-na qadar acele bir şey olmasa, evden çıqmağa yasaq etildi. Koronavirus yuqunçınıñ tarqaluvına yol bermemek içün işğal etilgen Qırımda ve Aqyarda «yüksek seviyeli azırlıq» rejimi kirsetildi.
Your browser doesn’t support HTML5
Rusiye quvetçileri Keriç köprü yanında maşinalarnı teşkere (video)
Aprelniñ 2-nde Keriç köpründe blokpost qoyuldı. Sergey Aksenov, bu blokposttan birinci iş künü ondan çoq maşina yiberilmedi, dep haber etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.