İşğal etilgen Qırımda 49 gektarlıq beş yanğın söndürildi. Aynı zamanda, tünevin qurtarıcılar Koktebelde 30 gektarlıq yanğınnı söndürmege devam eteler. Bu aqta Rusiye Fevqulâde vaziyetler nazirliginiñ matbuat hızmeti bildire.
Hususan, iyülniñ 15-nde saat 10:35-te Aqmescit rayonınıñ Urojnoye köyündeki "Drujba" bağça cemiyetinde olğan yanğınnı söndürdiler. Onıñ meydanlığı 15 gektarnı teşkil ete.
Bundan da ğayrı, yanğınlar şöyle yerlerde söndürildi:
- 15 gektar meydanlıqta Kefe bölük ormancılığı
- 2 gektarda Gruşevo uchastka ormançılıgı
- Kelev rayonınıñ Novofedorovka qasabasında 17 gektar, anda eki şahsiy ev zarar kördi.
"Rusiye Fevqulâde vaziyetler nazirliginiñ aviatsiyası Koktebelde yanğınnı söndürmege devam ete. Saba Rusiye Fevqulâde vaziyetler nazirliginiñ Mi-8 vertolötı 60 tonna suv tökti. Yanğınnıñ meydanlığı 30 gektar", — dep yaza müessise.
Keçken künü Qırımda büyük yanğınlar yüz berdi, Rusiye Fevqulâde vaziyetler nazirliginiñ idaresi Kоktebel ve Aqmescit rayonında quru ösümlik yanğanını bildirdi.
Daa evel haber etilgeni kibi, Qırımda iyül 15-19 künleri +38 derecege qadar anomal sıcaq olğanı sebebinden furtuna havfı ilân etildi, bu ise, iklim normalarından yedi derecege ziyade.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.