İşğal etilgen Qırımda daa dört koronavirus hastası qayd etildi, dep haber ete Rusiye kontrolindeki Qırım yolbaşçısı Sergey Aksenov.
«Bir qorantadan hastalanğan eki kişi Moskvadan kelgen soylarınen alâqada oldı, diger ekisi daa evel qayd etilgen hastalarnıñ qorantalarından ola. Er biri baqıldı ve yuqunç hastahanesine alındı. Klinik alâmetleri yoq», – dep yazdı o, aprelniñ 24-nde Facebookta.
Al-azırda Qırımda 57 koronavirus hastası bar. 20-si çetelden ketirildi, 10-u – Rusiyede, 27-si – yerli.
Qırım ve Aqyardaki Rospotrebnadzor idaresiniñ yolbaşçısı Natalya Penkovskayanıñ malümatına köre, eki yañı hasta Canköy rayonında ve birer kişi Bağçasarayda ve Yaltada qayd etildi.
Aprelniñ 23-nde Qırımda tasdıqlanğan 53 COVID-19 hastası bar edi. Aqyarda 25 koronavirus hastası qayd etildi. Qırımda ve Aqyarda özüni izolâtsiya etüv rejimi aprelniñ 30-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.