İşğal etilgen Qırımda keçken künü 13 yañı koronavirus hastası qayd etildi, dep bildirdi Rusiye kontrolindeki Qırım yolbaşçısı Sergey Aksenov Facebook saifesinde.
«Mayısnıñ 17-nde Qırım Cumhuriyetinde 13 yañı koronavirus hastası qayd etildi. 12-si qırğınlıq ile küreş tedbirleri ve laborator skriningi neticesinde qayd etildi. Bir hasta Krasnoyarsk ülkesinden keldi, keskin virus yuqunçı alâmetlerinen tibbiy yardım istegende qayd etildi. Hastalar yuqunç hastahanesine alındı. Rospotrebnadzor idaresiniñ mütehassısları qırğınlıq ile küreş tahqiqatını keçire, profilaktika tedbirleri yapılğan şahıslar belgilendi», – dep aytıla haberde.
Böylece, Qırımda 294 koronavirus hastası qayd etildi. 24-ü çetelden, 30-ı qomşu Rusiye regionlarından keldi, 27 hasta Rusiyeden kelgenlernen alâqada olğan edi, 211 hasta laboratoriyada tasdıqlanğan hastalarnen alâqada oldı, 2 kişi sağlam insannıñ tedqiqi neticesinde qayd etildi. 104 insan tüzeldi.
Rusiye akimiyetiniñ bildirgenine köre, mayısnıñ 16-nda Aqyarda üç COVID-19 hastası qayd etildi.
Hatırlatamız, mayısnıñ 16-nda Qırımda doquz yañı COVID-19 hastası qayd etildi.
Mayısnıñ 18-nden itibaren Qırımda özüni izolâtsiya etüv rejimi lâğu etile, amma maska taquv rejimi qala.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.