İşğal etilgen Qırımda keçken künü koronavirus şübhesinen hastahanege alınğan insanlarnıñ sayısı rekord oldı. Bu aqta Yarımadanıñ felâket tibbiyeti ve acele tibbiy yardım merkeziniñ matbuat hızmeti bildirdi.
Derc etilgen malümatqa köre, aprelniñ 26-nda COVID-19 şübhesinen 23 insan hastahanege alındı. Olarnıñ diagnozlarını laboratoriyada ya tasdıqlamaq, ya da red etmek kerekler, amma ekimler tedaviylemege başladı.
Matbuat hızmetiniñ bildirgenine köre, aprelniñ 25-nde 15 kişi koronavirus şübhesinen hastahanege alındı, aprelniñ 24-nde – 5 kişi, aprelniñ 23-nde – üç kişi.
Keçken künü keskin nefes virus yuqunçınen 23 insan hastahanege alındı, 8 kişi pnevmoniyanen hastahanege tüşti.
Aprelniñ 27-nde saba Qırımda bir koronavirus hastası qayd etildi – İslâm Terek rayonınıñ tibbiyet hadimidir.
Al-azırda Qırımda 70 koronavirus hastası bar. 20-si çetelden keldi, 10-u Rusiyeden, 40-ı yerli ola. Aqyarda, soñki malümatqa köre, 31 COVID-19 hastası qayd etildi.
Qırımda ve Aqyarda bir çoq müessise ve teşkilâtnıñ faaliyetini toqtatqan ve vatandaşlarnıñ özüni izolâtsiya etmesini belgilegen yüksek seviyeli azırlıq rejimi aprelniñ 30-na qadar devam ete.
Your browser doesn’t support HTML5
Aksenov koronavirus testini er kün yaptıra | Qırım.Aqiqat TV (video)
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.