Qırımda Bronıslav Danılovıç vefat etti — Rusiye akimiyeti tarafından patlayıcı maddeler ile qanunsız areketlerde şübeli sayılıp 6 yıl ve 11 ayğa azatlıqtan marum etilgen vatandaş jurnalisti ve aq qorçalayıcısı İrına Danilovıçnıñ babası. Bu aqta qırımlı faaller içtimaiy ağlarda bildire.
Bronıslav Danılovıç 78 yaşında edi. Faallerniñ bildirgenine köre, ölüm sebebi onıñ uzun vaqıt devamında küreşken rak hastalığı oldı.
Şimdi İrına Rusiyeniñ Stavropol ülkesinde, Zelenokumsk şeerindeki Rusiye qadınlar koloniyasında buluna ve onı soñki yolğa ozğarıp olamaycaq.
Aprelniñ 29-nda, İrına Danılovıç tutuluvınıñ yılında, «Sıñırsız reportörlar» halqara aq qorçalayıcı teşkilâtı onı acele azat etmege çağırdı. «İrına Danılovıç, serbest jurnalist, Qırımda işğalci küçler tarafından hırsızlanğanından 2 yıl keçti. O vaqıttan berli onı Rusiye apishanelerinde tutalar, ve sağlığı fenalaşa», dep qayd etti aq qorçalayıcılar.
Ukrayına Yuqarı Radası Rusiye Federatsiyasında tutulğan ukrayınalı jurnalistler, hususan Qırım.Aqiqatnıñ (Azatlıq Radiosınıñ leyhası) serbest hadimi Vladislav Yesıpenko ve qırımlı vatandaş jurnalisti İrına Danılovıçnı azat etip qaytaruv qararını qabul etti.
Danılovıç emşire olıp çalışa ve içtimaiy ağlarda saifesinde yaza edi, işğal etilgen yarımadada tibbiy saada çalışqanlarnıñ aqlarına ve sağlıq problemlerine bağışlanğan blog azırlay edi, Qırım.Aqiqatnen ekspert olaraq işbirligi yaptı.
Onı Rusiye Ceza Qanunnamesiniñ 222.1 maddesiniñ 1-inci qısmına istinaden patlayıcı madde ya da patlayıcı cihazlarnen qanunsız areketlerden şübheli sayğanlar – Rusiye FSBsi jurnalistni tibbiy inelernen patlayıcı cihaz yapqanında qabaatladı.
Neticede Qırımdaki Rusiye mahkemesi vatandaş jurnalistini yedi yılğa azatlıqtan marum etti.
Rusiye kontrolindeki Qırım Yuqarı mahkemesi vatandaş jurnalisti İrına Danılovıçnıñ ükmüne qarşı istinaf şikâyetini iyünniñ 15-ne belgiledi.
Qırım Muhtar Cumhuriyetiniñ prokuraturası İrına Danılovıçnıñ evinde keçirilgen qanunsız tintüv ve tutulmasınen bağlı cinaiy tahqiqat başlattı. Ukrayına cemaat teşkilâtları ise vatandaş jurnalistini azat etmege talap etti.
Alman yazıcısı Nina George Rusiye mahküm etken qırımlı vatandaş jurnalisti İrına Danılovıçke mektüpnen muracaat etti. Mektüp PEN Intenational teşkilâtı er yıl keçirgen apisteki yazıcılarğa qoltutuv kampaniyası içün yazıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.