Rusiye işğal etken Qırımda bir künde üçünci koronavirus hastası qayd etildi. Bu aqta Qırımdaki Rospotrebnadzor idaresiniñ matbuat hızmeti bildirdi.
«Qırım Cumhuriyetinde 1 yañı koronavirus hastası tasdıqlandı. Epidemiologik tahqiqat neticelerine köre, hasta 25.03.2020 tarihinden 28.03.2020 tarihine qadar Moskvada olıp, keskin nefes virus yuqunçı alâmetlerinen tibbiy müessisege muracaat etti ve Qırım tışına barğanını gizledi», – dep aytıla haberde.
Berilgen malümatqa köre, hastanen alâqada olğan tuvğanları ve tibbiyet hadimleri belli – 14 kişi observatorğa alındı.
«Uzaqtan alâqada olğan şahıslarğa qarşı profilaktika tedbirleri yapıla – evlerinde özüni izolâtsiya eteceklerine dair qararlar berildi, tibbiy közetüv yapıla. Böylece, 32 yañı koronavirus hastası bar, 23-ü ketirildi, 9-ı yerli ola», – dep bildirdi Rospotrebnadzor matbuat hızmeti.
Your browser doesn’t support HTML5
Koronavirus Qırımda: Kezlev civarındaki observator nedir (video)
Aprelniñ 12-si sabasına qadar Qırımda 31 koronavirus hastası qayd etildi. 2973 insan közetüv altında buluna. Aqyarda altı insan hastalandı, dördü tüzeldi.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.