Dekabrniñ 21 sabası itibarınen vaqtınca Qırımda COVID-19-nıñ 354 vaqiası qayd etildi, 8 adam öldi. Bu aqta Qırımnıñ Rusiye başı Sergey Aksönovnıñ matbuat hızmeti haber ete.
Berilgen malümatına köre, umumen pandemiya vaqtında Qırımda bu hastalıqtan 436 adam öldi.
Hasta olğanlarnıñ umumiy miqdarından, 305 tibbiy yardım içün muracaat etkende qayd etildi, 49 - daa evel qayd etilgen hastalarnen alâqada oldı.
Tünevin Qırımdaki laboratoriyalar 1010 insannı koronavirus yuqunçına teşkerdi.
Bir künde tedaviylengenlerniñ sayısı 264 adam, bütün vaqıt içinde - 16 674 adam.
Qırımnıñ Rusiye yolbaşçısı Sergey Aksenovnıñ bildirgenine köre, keçken künü Qırımda 350 yañı koronavirus hastası qayd etildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.