Altı yıl evelsi Aqmescitte Ukraina tarafdarı faal Timur Şaymardanov ğayıp oldı. 2014 senesi mayısnıñ 26-nda evden çıqıp qaytmadı.
Şaatlar ve faalniñ tuvğanları ğayıp olmasına «Qırım samooboronası» azalarınıñ alâqası bar, dep bildirdi.
Şaymardanovnıñ ğayıp oluvı aqqında bugün Qırımtatar Milliy Meclisiniñ reisi hatırladı. O, faalniñ tuvğanlarına sabır ve ümüt tiledi.
Şaymardanov – «Ukrain halq evi» cemaat teşebbüsiniñ faali, 2014 senesi mart ayında Qırımda Ukraina arbiylerine gumanitar yardımda iştirak etken edi.
Qırım işğalinden evel Timur iş adamı olıp, çeşit mallarnı satqan edi, daa evel sigorta ve audit şirketlerinde çalıştı, qazan tatarlarınıñ diasporasında faaliyet köstergen edi. Euromaydan başlağanınen onıñ tarafdarları saflarına kirdi. 2014 senesi mart ayında Yalı qaravullarınıñ ukrain ştabı ögünde Timur gece-kündüz nevbetçilikte iştirak etti, faaller elinden kelgeni qadar yardım etti, Ukraina arbiyleriniñ ruhunı yırlarnen köterdi.
2014 senesi baarde Timur Şaymardanov bir qaç kere Kyivge barıp kelgen edi, arbiyler ve siyasetçilernen körüşti. Amma, dost ve tuvğanlarınıñ aytqanına köre, resmiy Kyivniñ Qırımnı faal qorumaq istegini körip olamadı. Şunıñ içün qırımlı göñülliler diger vazifelerge diqqat ayırdı.
Timur Anğara (Perevalnoye) köyünde 36-ncı yalı qaravulları brigadasınıñ ukrain arbiyleri içün qalacaq yer, aş ve para qıdırdı. Komandan arbiy bölükke Rusiye arbiylerini kirsetti, 36-ncı brigadanıñ dağ-piyade askerler batalyonınıñ tahminen 80 ukrain arbiyi soqaqta qalğan edi.
Daa soñra Şaymardanov Ukraina arbiylerini Qırımdan çıqardı. «Ukrain halq evi» göñüllilerinen beraber eki biñden çoq arbiyge yardım etti.
Şaymardanovnen beraber faal Seyran Zinedinov da ğayıp oldı. Olarnıñ ğayıp oluvınen bağlı cinaiy davalar em Qırımda, em esas Ukrainada açılğan edi, lâkin bugünge qadar tahqiqatnıñ iç bir neticesi olmadı.
2018 senesi iyün ayında Kreml kontrolindeki Qırım Yuqarı mahkemesi advokat Emil Kurbedinovnıñ tahqiqatnıñ Şaymardanovnıñ hırsızlanması ve ğayıp oluvı davasınen bağlı areketlerine qarşı istinaf şikâyetini red etti.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.