Qırımda tahminen 90 sınıf ya da talebelerniñ 1,3%-ı uzaqtan tasil ala, dep haber ete Rusiye kontrolindeki Qırım Tasil nazirligi TASS agentligine.
Müessise malümatına köre, regiondaki oquv esnası «ştat rejiminde» devam ete.
«Nazirlik içtimaiy ağlarda qırımlılardan mektep tatilinen bağlı sualler alıp başladı. Öşek ve uyduruv olmasın dep haber etemiz. Küz tatili tasil müessiseleriniñ oquv cedvellerine köre olacaq. Bugünki künde nazirlik tatilni başqa vaqıtqa qaldırmağa tüşünmey», – dep bildirdi Qırım nazirligi.
Qayd etilgenine köre, koronavirus telükesi sebebinden mekteplerni uzaqtan tasilge tolusınen keçirmege planlaştırılmay.
Sentâbrniñ 30-nda berilgen malümatqa köre, Qırımda dört mektep ve 74 sınıf koronavirus sebebinden karantinge qapatıldı.
Qırımda keçken künü 107 koronavirus hastası qayd etildi. Umumen Qırımda, yerli akimiyetniñ malümatına köre, 5170 yañı koronavirus hastası qayd etildi. 107-si çetelden keldi, 128-i qomşu Rusiyeden kelgenler ve olarnen alâqada olğanlar, bu müddet devamında 3068 insan yahşı oldı. Yılnıñ başından Aqyarda 1135 insan yañı koronavirus yuqunçına oğradı, 711 kişi tüzeldi, 29 insan vefat etti.
Umumen Qırımda, yerli akimiyetniñ malümatına köre, 5063 yañı koronavirus hastası qayd etildi. 107-si çetelden keldi, 128-i qomşu Rusiyeden kelgenler ve olarnen alâqada olğanlar, 3008 insan tüzeldi, 69 hasta vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.