Martnıñ 24-nde işğal etilgen Qırımda 57 koronavirus hastası qayd etildi, 5-niñ hastalıq alâmetleri yoq, dep bildire Qırımnıñ Rusiye başı Sergey Aksönov.
«Hasta olğanlarnıñ umumiy sayısından 44 adam tibbiy yardım içün muracaat etkende qayd etildi, 12 daa evel qayd etilgen hastalarnen alâqada oldı. Bir künde 105, bütün vaqıt devamında ise 34 797 hasta tedaviylendi », – matbuat hızmeti Aksönovnıñ aytqanlarından alıntı ketire.
Qırımnıñ Rusiye sağlıq naziri Aleksandr Ostapenko Qırımda martnıñ 24-ne qadar 62499 insanğa koronavirus aşısı yapıldı, dep bildirdi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.