Qırımda fevralniñ 10-na qadar tahminen 15 biñ insan koronavirus aşısını almaq içün sırağa yazıldı, dep bildire Qırımnıñ Rusiye sağlıq naziri Aleksandr Ostapenko.
«18406 kişi aşılandı. Tahminen 15 biñ insan aşı olmaq içün nevbet aldı. 20 biñ aşımız bar. Eñ yaqın vaqıtta kelecek aşı da bar», – dep bildirdi COVID-19 ile küreş operativ ştabınıñ toplaşuvında.
Onıñ malümatına köre, aşı yapılmağa başlağanından Qırımğa 38 735 Rusiye koronavirus aşısı ketirildi.
Ostapenko, Canköy, Curçı, Aqşeyh ve Saq rayonları ve Sudaq sakinleri koronavirustan aşılanmaq içün muracaatta bulunmadı, dep qayd etti.
Keçken afta berilgen malümatqa köre, Qırımda 10 biñden çoq insan koronavirus aşısını aldı.
Qırım akimiyeti yarımada sakinlerine COVID-19 «Sputnik V» aşısını almağa teklif ete. Qırımnıñ sağlıq nazirligi qayd etkenine köre, aşı «tek istegenlerge» eki doz olaraq yapıla. Romanovskaya, Rusiye koronavirus aşısınıñ yapılması kimge tevsiye etilmegenini aydınlatqan edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.