İlk küzniñ 14-nde gece Qırımda ve Aqyarda patlavlar ve atışlar eşitildi, Rusiye kontrolindeki Aqyar yolbaşçısı Mihail Razvojayev şeerge dronlar ücüm etkenini bildirdi.
Razvojayevniñ bildirgenine köre, Aqyarda ava telükesi yerli vaqıtnen saat 22:44-ten 0:25 ve saat 1:19-dan 1:38-ge qadar ilân etilgen. İk küzniñ 14-nde saba o, keçken bir künü Rusiye arbiyleri 27 dronnı urıp tüşürgenini bildirdi. Razvojayevniñ aytqanına köre, ücüm neticesinde dört insan zarar kördi.
"Şeer hastahanesine bir erkek ve bir qadın ketirilgen, ava telükesi vaqtında olar Nahimov meydanında, açıq yerde buluna ediler", — dep bildirdi Razvojayev.
Aqyardan ğayrı, patlav ve atışlar Qırım yarımadasınıñ diger rayonlarında da eşitildi. Şu cümleden, "Krımskiy veter" telegram kanalı yerli sakinlerge atıf eterek, Saq rayonında ve Keriçte olğan patlavlar aqqında yazdı. Bu malümatnıñ daa bir tasdıqlanması kerek.
Ukrayina arbiyleri ücümni şimdilik izaatlamadı.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.