Qırım ve Aqyarda iyünniñ 12-nde gece yerli vaqıt ile saat 2:50 ve 4:00 patlav sesleri eşitildi, Keriç köprü qapatıldı, dep haber ete rusiye ve Qırım telegram kanalları.
"Krımskiy veter" kanalınıñ yazğanına köre, Aqyarda patlavlar saat 2:47 başlanğan, Kezlev, Saq ve Krasnoperekopskta - saat 02:50 ve 8-10 daqqa devam etken. Ermeni Bazarda saat 4:00 yaqın 1-2 patlav aqqında haber etildi.
Aqyarnıñ Rusiye yolbaşçısı Mihail Razvojayev bildirdi ki, şeerge raketalar ücüm etildi. Onıñ aytqanına köre, acele hızmetlerge Kombriga Potapov soqağı ve Yuharina belkası rayonında yıqılğan parçalar aqqında haber keldi. Razvojayevniñ yazğanına köre, zarar körgenler ve yaralanğanlar yoq. Bu beyanatlarnı mustaqil menbalarnen teşkermek şimdilik imkânsız.
Rusiye Mudafaa nazirligi bu malümatnı izaatlamadı.
Daa evel haber etilgenine köre, iyün 10-na keçer gecesi Ukrayina Mudafaa quvetleri Canköy rayonında S-400 zenit-raketa kompleksiniñ divizionına ve Qara deñiz ve Kezlev civarında eki S-300ge ücüm etti. Ukrayina Silâlı quvetleriniñ Baş ştabı darbelerni muvafaqiyetli dep adladı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.