Rusiye Federatsiyası tarafından işğal etilgen Qırımnıñ sivil saalarında Rusiye Federatsiyasınıñ Ukrayinağa keñ kölemli basuvınıñ tesiri kettikçe daa çoq is etile. Rusiye akimiyeti anda nezaret ve sıñırlavlarnı quvetleştire. Ekspertlerniñ bildirgenine köre, Qırım yarımadasında ilk problemler Rusiye ordusında peyda oldı. Rusiye Ukrayina ile cenkleşken Qırımda neler olğanını Qırım.Aqiqatnıñ materialında tarif etemiz.
Rusiye Federatsiyasınıñ Ukrayinağa basuvı vaqtında Qırım cebe yanındaki bölgege çevirildi demek mümkün. Yerli Rusiye akimiyeti bölgede "acele azırlıq rejimi"ni ilân etti. O, ilk nevbette profil hızmetlerini celp ete. Amma Rusiye Ukrayinağa qarşı arbiy areketlerini devam ettirgen vaqıtta, Qırımda ve diger sivil saalarında yañı deñişmelerni is ete.
Rusiye ordusına askerlikke aluvdan başlap, terakt telükelerine qadar
Qırımnıñ sivil saaları terroristik telükelerge azırlana. Qırımda muntazam sürette keçirilgen talimlerden ğayrı, bölgedeki naqliyat ve alâqanı sıñırlağan arbiy birleşmeler, diniy teşkilâtlarnen terrorizmge qarşı iş alıp baralar.
Saban ayınıñ başında Yaltanıñ Rusiye memuriyetinde diniy teşkilâtlarnıñ vekillerinen diniy binalar ve diger diniy obyektlerniñ terrorizmge qarşı qoruv algoritmleri muzakere etildi. Nege böyle zaruriyet ve diniy teşkilâtlar içün telükeli ne olğanı aydınlatılmay.
Kezlevde Qaray kenası
Memurlar hadimlerni ve din adamlarını fevqulâde vaziyetler senariyi ve ekstremizm ve terrorizmge qarşı mefküreviy işke celp eteler.
"Diniy teşkilâtlarnıñ vekilleri eali, hususan gençler ile dialogda faal iştirak etmege azır olğanını bildirdi. Birleşken ğayretler cemiyette terrorizm mefküresini qabul etmemege, onıñ cinaiy maiyetini añlatmağa, em de ekstremistik ve terroristik faaliyetinde iştirak etüv içün qanunlarda belgilengen mesüliyetke yol bermemege doğrultılğan", — dep haber ettiler müessisede.
Kiçik ayda din adamları ve "milliy-medeniy muhtariyet" vekilleri Qırımlılarnı Rusiye ordusına askerlikke aluvğa celp etildi. Şu cümleden, Kefe Rusiye akimiyeti olarnen bu imkânnı muzakere etti ve RF Silâlı quvetlerinde arbiy hızmetke añlaşma yapmaq imkânı aqqında malümat bülletenlerini tarqattı.
Tasviriy resim
Memurlarnı dronlarnı urıp tüşürmege yollaycaqlarmı?
Qırımnıñ vatandaş hızmetçilerini arbiy vazifelerge celp ete bileler. Bölgede Rusiye ava mudafaasınıñ bölükleri ile problemler peyda oldı, dep bildire RF tarafından işğal etilgen Ukrayina topraqlarında faaliyet köstergen Ukrayina tarafdarı partizan areketleriniñ saifeleri.
"Qırımnıñ ava mudafaasınıñ bölüklerinde toplanğan zararlardan sebep Aqyarğa Moskvadan teşkerüv komissiyası yollanıldı. "ATEŞ" agentleriniñ malümatına köre, Ava mudafaasınıñ 31-inci diviziyasınıñ komandanlıq terkibini deñiştirmek meselesi baqıla. Soñki vaqıtları ava mudafaası vastalarınıñ büyük ğayıpları Herson vilâyeti ve Qırımnıñ qoruvınıñ zayıflaşmasına sebep oldı. Moskva bunı tanığanına oşay", — dep bildire "ATEŞ" areketi.
Tasviriy resim
Rusiye akimiyeti böyle teşkerüv aqqında açıq şekilde aytmadı. Rusiye Federatsiyası ve Ukrayina arasında arbiy areketler şaraitinde bu malümatnı teşkermek imkânsızdır.
Qırımda ava mudafaasınen bağlı problemler aqqında Ukrayina tarafdarı "Vidsiç" areketi de bildire. Qırımnıñ rusiyeli akimiyeti memurlar ve bücet müessiseleriniñ hadimlerinden avuşıcı ateş gruppalarını teşkil etmege azırlana, dep bildire "Vidsiç" öz menbalarına atıf etip.
Olarnıñ malümatına köre, Rusiye memuriyetleriniñ ve olarnıñ nezaretindeki teşkilâtlarnıñ reberlerine "emirler berildi", ve bu "cevap gruppalarına" celp etilmesi planlaştırılğan insanlarnıñ cedvelleri teşkil etildi.
Arhiv fotoresimi
"Bu qızğın özüni teşkil etüvniñ sebebi sade: Qırımdaki Rusiye ava mudafaası Ukrayin dronlarına qarşı semereli olmağanını köstere, soñki bir ay içinde ava mudafaasınıñ büyük qısmı uçucısız cihazlarnıñ darbelerinden zarar kördi ya da yoq etildi", — dep aytıla haberde.
Qırımda bunıñnen bağlı iç bir haber yoq. Bundan evel bölgede Qırım yarımadasını Ukrayina Silâlı quvetlerinden qorçalamaq içün "BARS-Qırım" silâlı mufrezeler teşkil etildi. Onıñ erkânına yerli memurlar ve deputatlar kire.
Ukrayina mudafaa quvetleri Qırım yarımadasında Rusiye ava mudafaası obyektlerine ücümlerni quvetleştirdi. Soñki aylarda olar Qırımnıñ farqlı bölgelerinde Rusiye zenit-raketa qurulışları, "Pantsır" ve RLS-lerniñ yoq etilgeni aqqında bildire. Rusiye akimiyeti bunı bildirmey. Olar, Qırım territoriyasında Ukrayina Silâlı quvetleriniñ dronlarınıñ muntazam ücümlerini tasdıqlaylar, amma olarnıñ episi tüşürilgenini ve bastırılğanını aytalar.
"Quru koridor" boyunca ve Qırımnıñ şimalinde logistika bayağı qıyınlaştı
Ukrayina mudafaa quvetleriniñ bu darbeleri Qırımnı Rusiyenen Ukrayinanıñ işğal etilgen bölgeleri üzerinden birleştirgen "quru koridor" boyunca Rusiye logistikasını bayağı qıyınlaştıra, dep bildire Ukrayin arbiy talilcisi, Ukrayina mudafaa naziriniñ sabıq mesleatçısı Oleksiy Kopıtko.
O, Ukrayina mudafaa quvetleriniñ yaqında Aqyarda, Canköyde, em de Qırımğa yaqın olğan Herson vilâyetinde Rusiye ava mudafaasınıñ obyektlerine yapqan darbelerini hatırlattı.
"Eñ tesirli şey, Qalay meskün yerini (Canköyden 15 km cenübiy-şarqta) Ukrayin dronları yerli neft bazasını (obektleri Aqmescitniñ sanayı zonasında zarar körgen Qırım yaqarlıq-energetika şirketiniñ strukturalarını) beslegen üç avtosisternanı yoq etti. Bu "quru koridor" boyunca ve umumen Qırımnıñ şimalinde logistika bayağı qıyınlaştı demek", — dep iddia ete o.
Ukrayina mudafaa quvetleriniñ Qırımdaki arbiy obyektlerge ücümleri yaqın vaqıtta toqtatılmaycaq, dep emin Qırımtatar Milliy Meclisiniñ reisi Refat Çubarov.
Refat Çubarov
"Er gece bölükleri işğal etilgen Qırımda Rusiye varvarlarınıñ arbiy obyektlerine ücüm etken komandanlardan biri ile laf etmege imkânım oldı. Qısqadan: Rusiye varvarları yarımadadan sıqıştırılıp çıqarılmağance, işğal etilgen Qırımda özlerini bir kün bile telükesiz duymaycaqlar. Qırım, kerçekten tipik cebe yanındaki topraq oldı", — dedi o.
Refat Çubarov Qırım sakinlerini kene Rusiye Federatsiyasınıñ arbiy obyektlerinden uzaq turmağa çağırdı.